चपौली(सिन्धुली) — कलाघर सिन्धुलीको आयोजनामा भइरहेको राष्ट्रिय कला महोत्सव अवलोकन गर्नेको संख्या दैनिक बढ्दो छ । मौसमका कारण पहिलो दिन अवलोकन गर्नेको संख्यामा केही कमी भए पनि अहिले उत्साहजनक रहेको राष्ट्रिय कलाघर सिन्धुलीले जनाएको छ । 

विश्वका १९५ देशलाई कलामार्फत एकतृत गरी वर्ल्ड आर्ट हाउसको रुपमा विकास गर्ने दीर्घकालीन योजनासहित ७ दिने कला महोत्सवमा ऐतिहासिक पूरातात्विक सामग्रीको प्रदर्शनीका साथै सांस्कृतिक सम्पदाले सजाइएको छ ।

राट्रिय कलाघरलाई कलाकारको आश्रम, कला आविष्कार सृजना केन्द्र तथा सांस्कृतिक विश्वविद्यालय बनाउन कला महोत्सवको आयोजना गरिएको परिकल्पनाकार तथा कलाघरका अध्यक्ष सुमन थापामगरले बताए ।

महोत्सवमा नेपाली मौलिक परम्परा झल्कने घरहरुको नमुना, मौलिक बाजागाजा, जातजातीहरुको झाँकी, रागटे पिङ, चित्रकला, अर्गानिक खानेकुरा, चियादानीमा पकाएको चिया, घरजत्रै ठेकीबाट मोही लगायत महोत्सवका आकर्षण छन् ।

महोत्सवमा खैंजडी भजन, लोकदोहोरी, राष्ट्रिय कलाकारहरुको प्रस्तुति भइरहेको छ । कलाघर पुग्नको लागि बीपी राजमार्गको सोलाभन्ज्याङबाट सिन्धुलीगढी हुँदै ७ किलोमिटर पार गरेर चपौली पुग्नुपर्ने हुन्छ । कलाघरसम्म नै कालोपत्रे सडक भएकाले यात्रा सहज रहेको अध्यक्ष थापामगरले जनाए । 

महोत्सवको उद्घाटन बाग्मती प्रदेशका मुख्यमन्त्री बहादुरसिं लामाले गरेका थिए । महोत्सव वैशाख ३ गतेसम्म चल्नेछ ।