काभ्रे — कर्तव्य ज्यान कसुरका फरार प्रतिवादीलाई जिल्ला प्रहरी कार्यालय काभ्रेले ३१ वर्षपछि पक्राउ गरेको छ ।
पक्राउ पर्नेमा काभ्रेको साबिक नाग्रेगागर्चे गाविस-९ (हाल चौंरीदेउराली गाउँपालिका-२) स्थित दूतीका ५७ वर्षीय दानबहादुर प्रधान रहेको जिल्ला प्रहरी कार्यालय काभ्रेका सूचना अधिकारी प्रहरी नायब उपरीक्षक मीनबहादुर घलेले जानकारी दिए ।
उनका अनुसार दानबहादुर २०५० वैशाख १६ गते साँझ ७ बजेको समयमा सोही स्थानका उत्तरबहादुर प्रधानलाई चक्कु प्रहार गरी हत्या गरी फरार थिए । फरार उनलाई अदालतले कर्तव्य ज्यान मुद्दामा २०७६ माघ २८ गते जन्मकैदको सजाय फैसला गरेको थियो । प्रहरीले आइतबार धुलिखेल नगरपालिका-७ बाट उनलाई पक्राउ गरेको हो ।
उनलाई फैसला कार्यान्वयनका लागि आइतबार नै जिल्ला कारागार धुलिखेल पठाइएको प्रहरीले जनाएको छ ।
