हेटौँडा — मकवानपुरमा भीरबाट लडेर डढेलो लागेको ठाउँमा पुग्दा एक पुरुषको मृत्यु भएको छ। भीमफेदी गाउँपालिका–१ का ४९ वर्षीय अकिलबहादुर पाख्रिन भीरबाट लडेर डढेलो लागेको ठाउँमा पुगेका थिए । उनको जलेर मृत्यु भएको जिल्ला प्रहरी कार्यालय मकवानपुरले जनाएको छ।

स्थानीय सामुदायिक वनमा बुधबार दिउँसोदेखि डढेलो लागिरहेको थियो। गोठमा आगो लाग्ने डरले अकिलबहादुर पाख्रिन बुधबार राति ११ बजे पत्नी र दाजुसहित आगलागी भएको स्थानतर्फ गएका थिए। हेर्ने क्रममा उनी भीरबाट खसेका थिए।

पाख्रिनका पत्नी र दाजुले रातभर खोजी गरे पनि डढेलोको धुवाँका कारण उनी भेट्टाउन सकेनन्। बिहीबार बिहान परिवार तथा स्थानीयवासीले खोजी गर्दा डढेलोले डढेको अवस्थामा उनको शव फेला परेको थियो।