सिन्धुपाल्चोक — जिल्लाको चौतारा साँगाचोकगढी नगरपालिकाको वडापिच्छै पुगेर सहिदको सहादतलाई सम्झँदै सहिदका परिवारलाई सम्मान गर्न थालिएको छ । सिन्धुपाल्चोक प्रतिनिधि सभा १ समन्वय समितिका संयोजक तथा नेता टिएन सापकोटाकाअनुसार प्रारम्भिक चरणमा बुधबार चौतारा साँगाचोकगढी नगर वडा २ र ३ का सहिद परिवारलाई सम्मान गरिएको हो ।

जनयुद्धमा सहादत पाउने सहिद र युद्धमा होमिएका कारण बेपत्ता पारिएका सम्पूर्णको सम्झना र कदर गर्दै यो अभियान थालिएको माओवादी केन्द्र बाग्मती प्रदेश सचिवालय सदस्यसमेत रहेका सापकोटाले बताए । ‘सहिदका कारण हालको परिवर्तन र समानता सम्भव भएको हो, त्यस कारण यो अभियान थालेका हौं, दोसल्ला ओढाएर सम्मान गर्दै चिनोस्वरुप पानी पिउने करुवा पनि उपहार दिएका छौं,’ सापकोटाले भने । 

बुधबार चौतारा साँगाचोकगढी नगर वडा २ र ३ का सहिद क्रमशः गणेशबहादुर थापा, विष्णु पराजुली, बाबुकाजी ढुंगाना, होमनाथ ढुंगाना र बेपत्ता पारिएका गेदबहादुर बस्नेतका परिवारलाई सम्मान गरिएको थियो । 

जनयुद्धका लागि बुधबार बलिदान दिवस ०८१ रहेको र यो एक हप्ताभर यसलाई सहिद सप्ताहको रुपमा मानेर नगभरीका सहिद परिवारको घरमा पुगेर सम्मान गर्ने उनले जानकारी दिए । ‘यो पावन सहिद बलिदान सप्ताह अभियान यो हप्ताभर चल्नेछ, हामी नगरभरी पुगेर सहिदलाई सम्झँदै सहिद परिवारलाई सम्मान र अभिनन्दन गर्नेछौं,’ वाइसिएल सिन्धुपाल्चोकका प्रमुख सुमित काफ्लेले भने । 

सहिद परिवारका नाममा कुविण्डेमा एउटा सामुदायिक भवन निर्माण गरिएको छ । यहाँका स्थानीयले गाउँभरका सहिदका तस्बिर संकलन गरेर भवनभित्र राखेर सम्मान गर्ने अभियान सुरु गरेका छन् । यसबाहेक जिल्लाको सदरमुकाम चौतारा बजारमा सहिद र बेपत्ताको सम्झनामा स्तम्भ ठड्याइएको छ । सहिदभूमि कुविण्डे पूर्व सभामुख अग्निप्रसाद सापकोटा, प्रतिनिधि सभा १ का संघीय सासद माधव सापकोटा सुवोधको गाउँ हो ।