चितवन — कौडा भन्ने गरिएको मगर समुदायको परम्परागत नाँच ‘कौराहा’को मौलिकता उजागार गर्ने उद्देश्यसहित देवघाटमा सांस्कृतिक कार्यक्रम हुने भएको छ ।

तनहुँ देवघाट गाउँपालिकाको देवघाट मगर उत्थान समाजले ४३ औं मगर स्थापनाको दिवस पारेर बिहीबार कार्यक्रम गर्न लागेको हो । मगर जातिको सांस्कृतिक पहिचान बोकेको कौराहाको वास्तविक रस हराउँदै गएको हुँदा सिंगो समुदाय चिन्तित बनेको समाजका कार्यवाहक अध्यक्ष अमृता थापामगरले बताइन् । 

‘कौराहाको वास्तविक रस हराउँदै गएको हामीलाई महसुस भएको छ । सोही कारणले हामीले कौराहालाई नयाँ पुस्तामा पनि हस्तान्तरण गर्न अप्रतियोगिताका रुपमा नै विभिन्न समूहको मौलिक कौराहासँगै कार्यक्रममा मौलिक भेषभूषा प्रदर्शन गर्न गइरहेका छौं,’ बुधबार देवघाटमा आयोजित पत्रकार सम्मेलनमा कावा अध्यक्ष अमृता थापा मगरले भनिन् । साथमा कार्यक्रममा राष्ट्रिय दोहरी कालाकार र स्थानीय कालकारले पनि आफ्नो कला प्रस्तुत गर्ने उनले जानकारी दिइन् । कौराहालाई मगर समुदाय कानराहा पनि भन्छन् । 

‘मगर भाषामा कान भनेको हामी र राहा भनेको आयौं हो । कानराहाको भावार्थ हामी आयौं भन्ने हुन्छ । समूहमा युवायुवती महिला पुरुष मिलेर खैंजडी र अन्य बाजाको तालमा गाउँदै नाच्ने कौराहा पहिलाको जमानामा सात दिन सात रात पनि नाँचेर सकिदैन थियो भन्ने गरिन्थ्यो,’ समाजका सदस्य आशिक रानामगरले भने । मगर समुदायमा विभिन्न याममा विभिन्न नाच नाच्ने चलन छ । फागुनदेखि भदौसम्म कौराहा नाच्ने उनले बताए ।