दोलखा — गौरीशंकर संरक्षण क्षेत्रअन्तर्गत गौरीशंकर गाउँपालिका–७ को सिक्पास्वरभन्दा माथिल्लो क्षेत्रको हिमाली वनमा लागेको डढेलो नियन्त्रण आएको छ । गत माघ १५ गतेबाट लागेको डढेलो ९ दिनपछि नियन्त्रणमा आएको हो ।

डढेलोले ६ सय हेक्टर भन्दा बढी जंगलसहित रेडपाण्डा जाने क्षेत्र रहेको निगालोको जंगल पूर्ण रूपमा जलेको छ । डढेलो नियन्त्रणबाहिर गएपछि नियन्त्रणमा लिन ७० जनाको टोली परिचालन गरिएको थियो । बुधबारदेखि खटिएको टोलीले बिहीबार डढेलो नियन्त्रणमा लिएको हो । 

डढेलो नियन्त्रणका लागि नेपाली सेना, जनपद, सशस्त्र प्रहरीसहित संरक्षण क्षेत्रको उपसमिति र स्थानीय खटिएको संरक्षण क्षेत्रका प्रमुख तुलसीप्रसाद दाहालले बताए । उनका अनुसार डढेलो नियन्त्रणका लागि चारैतिबाट टोली खटिएको थियो । ‘हिजो र आज गरेर दुई दिनमा डढेलो नियन्त्रणमा लिएका छौं,’ उनले भने, ‘डढेलोले वन्यजन्तुको अवस्था के कस्तो छ, अध्ययन गरिरहेका छौं ।’