एक घर र टहरो जल्दा ९० लाख रुपैयाँ बराबरको क्षति
काभ्रे — काभ्रेमा रहेको एक फर्निचर तथा काष्ठ उद्योगमा आगलागी हुँदा एक महिलाको मृत्यु भएको छ । शुक्रबार राति ९ बजेको समयमा काभ्रेपलाञ्चोकको धुलिखेल नगरपालिका-९ काभ्रेभञ्ज्याङ स्थित श्यामसुन्दर फर्निचर तथा काष्ठ उद्योगमा विद्युत सर्ट भइ आगलागी भएको थियो ।
आगलागीमा परी उद्योगमा काम गर्ने काठमाडौँको शंखरापुर-१ नाङ्लेभारे बस्ने ७० वर्षीया टीकादेवी दंगालको आगोमा जलेर मृत्यु भएको जिल्ला प्रहरी कार्यालय काभ्रेका सूचना अधिकारी प्रहरी नायव उपरीक्षक मीनबहादुर घलेले जानकारी दिए ।
उनका अनुसार आगलागीमा परी दंगालका श्रीमान् ७३ वर्षीय तोयानाथ दंगाल घाइते भएका छन् । उनको धुलिखेल अस्पतालमा उपचार भइरहेको छ । आगलागीबाट उद्योगसँगै ढुंगामाटोले बनेको ध्रुबहादुर विकको एक तले कच्ची घर र जस्ताले बेरेको जस्ताले छाएको एक तले टहरो समेत क्षतिग्रस्त भएका छन् ।
आगलागीबाट ९० लाख रुपैयाँ बराबरको क्षति भएको प्रहरीले जनाएको छ ।
