चितवन — नारायणगढको नारायणी नदी किनारमा १५ औं चितवन महोत्सव सुरु भएको छ । व्यापारिक तथा औद्योगिक बस्तुको प्रदर्शनीसहित बिहीबारदेखि महोत्सव सुरु भएको हो ।
चितवन उद्योग वाणिज्य संघले आयोजना गरेको महोत्सव १५ दिनसम्म चल्नेछ । उद्योग, वाणिज्य तथा आपूर्ति मन्त्री दामोदर भण्डारीले महोत्सवको उद्घाटन गर्दै स्वदेशी र विदेशी लगानी बढाउन सरकारले धेरै कानुन परिवर्तन गर्ने तयारी गरेको बताए ।
‘सरकारी संरचना र नीतिगत जटिलताले गर्दा स्वदेशी होस् या विदेशी लगानी बढ्न सकेको छैन । लगानीमैत्री वातावरण बनाउन हामी नीतिगत जटिलता एकैपटक हटाउने तयारीमा छौं,’ उनले भने ।
हालका ऐन कानुन नियन्त्रित र निषेध गर्ने चरित्रका भएका कारणले लगानी र उत्पादनलाई नै निषेध गरेको उनले बताए । एउटा सरलीकृत कानुन बनाएर प्रक्रियागत जटिलता हटाउने उनले आश्वासन दिए ।
‘सार्वजनिक खरिद ऐन, जग्गा प्राप्ती, वन वातावरणलगायतका दर्जनौं कानुन जो आन्तरिक र बाह्य लगानीका बाधकका रूपमा छन्, तिनको प्रतिस्थापन गरी सरलीकृत कानुन ल्याउँछौं । ताकि विदेशी लगानीलाई ह्वारह्वार्ती बढाउन सकियोस्,’ मन्त्री भण्डारीले भने ।
उद्योग मन्त्रालयले ‘सुपर फास्ट ट्रयाकबाट औद्योगिक व्यावसायिक ऐन, कम्पनी ऐन, विशेष आर्थिक क्षेत्र (सेज) ऐन संशोधन गर्नेर् तयारी गरेको पनि उनले बताए ।
आर्थिक क्रियाकलाप बढाउने उद्देश्यले चितवन उद्योग वाणिज्य संघले २०५३ देखि दुई वर्षको अन्तरालमा महोत्सव गर्दै आएको छ । महोत्सव परिसरमा ४ सय ३० वटा स्टल रहेको महोत्सव मूल समितिका संयोजक चितवन उद्योग वाणिज्य संघका अध्यक्ष सुमनकुमार श्रेष्ठले बताए ।
महोत्सवमा चीन, बंगलादेश र पाकिस्तानबाट पनि प्रदर्शक आएका छन् । महोत्सवअन्तर्गत नै नारायणगढ क्याम्पाचौरमा पुस २९ गतेदेखि माघ ४ सम्म परम्परागत खानाको प्रवर्द्धनका लागि फुड फेस्टिभलसमेत हुनेछ ।
पाँच लाख दर्शकले महोत्सव अवलोकन गर्ने महोत्सवमा ३० करोड रुपैयाँ बराबरको कारोबार हुने आयोजकको अपेक्षा छ । महोत्सव उद्घाटनअघि विभिन्न जातजाति समुदायको सांस्कृतिक झाँकीसहितको शोभायात्रा निस्केको थियो ।
