गुफाडाँडा, सिन्धुपाल्चोक — २ हजार ५ सय २० मिटरको उचाइमा रहेको सिन्धुपाल्चोकको मेलम्ची नगरपालिका–९ स्थित पर्यटकीय स्थल गुफाडाँडामा ‘जलवायु दिवस–२०८१’ मनाइएको छ ।

मेलम्ची नगरपालिकाको सहयोगमा गुफाडाँडामा वाग्मती प्रदेशका मुख्यमन्त्री बहादुरसिं लामा तामाङ, वाग्मती प्रदेशका दुई मन्त्री, जनप्रतिनिधि र जलवायुसम्बन्धी सरोकार राख्नेहरूबीच छलफल गर्दै बुधबार जलवायु दिवस सम्पन्न गरिएको हो । 

०७५ साल १५ पुसमा ७७ वटा जिल्लाका समन्वय समितिका प्रतिनिधि, देशभरका केही जनप्रतिनिधि र कर्मचारीको उपस्थितिमा गुफाडाँडामा प्रथम जलवायु सम्मेलन भएको थियो । त्यतिबेला निर्मित पृथ्वी उठाइरहेको प्रतिकात्मक सेताम्मे मान्छेको मूर्ति र ७७ वटा झण्डामा हेर्दै वाग्मती प्रदेशका मुख्यमन्त्री, वाग्मती प्रदेशका मन्त्रीद्वय वन तथा वातावरण मन्त्री कृष्णप्रसाद सिलवाल, आन्तरिक मामिला तथा कानुन मन्त्री सुरजचन्द्र लामिछाने, पूर्वकानुन मन्त्री शेरबहादुर तामाङले जलवायुको असरबारे आवाज उठाएका थिए ।