घोर्थली — जिल्लाको दुर्गम त्रिपुरासुन्दरी गाउँपालिका–१ घोर्थली गाउँमा बुधबार बर्थिङ सेन्टरसहितको सुविधाजनक स्वास्थ्य चौकी भवन उद्घाटन भएको छ ।

उद्घाटन अवसरमा उपस्थित त्रिपुरासुन्दरी–१ का ८७ वर्षीय पूर्ववडाध्यक्ष कर्णबहादुर खड्का ज्यादै भावुक देखिए । सात वर्षअघि यही गाउँमा स्वास्थ्य चौकीको माग गर्दा गाउँसभाबाट निकालिएको क्षण सम्झिएर आफू भावुक बनेको उनले सुनाए । 

‘सात वर्षअघि यही गाउँका लागि स्वास्थ्य चौकीको माग गर्दा गाउँसभाबाटै निकालिएको थिएँ, अपमान सहेर म रोएर निस्किएँ तर आज त्यो सपना पूरा भएको देख्दा ज्यादै खुसी लागेको छ, त्यो खुसी म कसरी बाडौं ?,’ पूवडाध्यक्ष खड्काले भने ।

‘स्वास्थ्य चौकीको माग गर्दा ८१ वर्षको थिएँ, अहिले ८७ वर्षको पुगें, अब पहिलेजस्तो सुत्केरी र गर्भवतीले बाह्रबिसे धाउन पर्दैन, बिरामीले सकस पाउन पर्ने छैन,’ खड्काले भने ।