टाइगर ग्रुप अफ पोखरा नेपालको आयोजनामा एनसेल छैटौं टाइगर कप राष्ट्रिय तथा अन्तर्राष्ट्रिय आमन्त्रित खुल्ला क्लब च्याम्पियनसिप महिला तथा पुरुष भलिबल प्रतियोगिता शुक्रबारदेखि पोखरा रंगशालामा सुरु हुँदैछ ।

१७ माघसम्म हुने प्रतियोगिताको सम्पूर्ण तयारी पूरा भएको छ । प्रतियोगितामा पुरुषतर्फ ६ र महिलातर्फ ५ गरी कुल ११ टिमको सहभागिता रहने आयोजकले जनाएको छ । प्रतियोगिताको यो छैटौं संस्करणमा विदेशी टिमहरूको समेत सहभागिता रहने भएकोले नेपाली भलिबल प्रेमीका लागि यो विशेष आकर्षणको केन्द्र बन्ने देखिएको छ । यसै सन्दर्भमा आयोजक संस्था टाइगर ग्रुप अफ पोखरा नेपालका अध्यक्ष नारायणप्रसाद शर्मासँग कान्तिपुरका लागि दीपक परियारले गरेको कुराकानीको सम्पादित अंश : 

टाइगर कपले छैटौं संस्करणसम्म आइपुग्दा एउटा बलियो ब्रान्ड र पहिचान बनाइसकेको छ । पहिलो संस्करणदेखि अहिलेसम्म फर्केर हेर्दा यसपालि प्रतियोगितालाई के कुराले बढी विशेष र भव्य बनाइएको छ ?

भलिबल राष्ट्रिय खेल भएसँगै हामी आज छैटौं संस्करणमा आइपुगेका छौं । पाँचौं संस्करणदेखि एनसेलले मुख्य प्रायोजकका रूपमा साथ दिइरहेको छ । गण्डकी प्रदेश भलिबलको उर्वर भूमि भएकाले यही कोर्टबाट धेरै महिला र पुरुष खेलाडीहरू उत्पादन भएका छन् । हिजोको इतिहास हेर्ने हो भने सिपोरा गुरुङ, मञ्जु गुरुङ, अरुणा शाही, प्रतीक्षा गुरुङलगायत धेरै महिला खेलाडी र बलबहादुर श्रेष्ठ, बलराम गुरुङ, सफल बिकलगायत धेरै खेलाडी यही कोर्टमा खेलेर अन्तर्राष्ट्रियस्तरसम्म पुग्न सफल हुनुभएको छ ।

छैटौं संस्करणसम्म आइपुग्दा हामीले यसलाई समय र प्रविधिमैत्री बनाउँदै एउटा ब्रान्डका रूपमा स्थापित गर्न खोजेका छौं । वास्तवमा भलिबल इन्डोर खेलिने खेल भए पनि हामीले अहिले आउटडोर (खुला मैदान) मा आयोजना गरेका छौं । भलिबल संघका केन्द्रीय अध्यक्ष (जितेन्द्रबहादुर चन्द) को नेतृत्वले यस प्रतियोगितालाई नजिकबाट नियालेर एफआईभीबी र काभासम्म पुर्‍याइदिनुभएको छ । टाइगर ग्रुपले राष्ट्रिय खेल भलिबललाई आउटडोरमा पनि उत्तिकै भव्य रूपमा खेलाउन सकिन्छ भन्ने प्रमाणित गरिदिएको छ ।  

भदौको जेन–जी आन्दोलन पनि नभएको भए काभा महिला भलिबल प्रतियोगिता राखेप कभर्डहलमा नखेलाई टुँडिखेलमा आउटडोरमा राख्न खोजेको थियो तर प्राविधिक कारणले रोकिएर अहिले माल्दिभ्समा हुँदै छ । यसले भलिबल आउटडोरमा पनि सम्भव छ भन्ने पुष्टि गरेको छ ।

यसपटक हामीले भौतिक संरचनामा पनि सुधार गरेका छौं । दर्शकका लागि बस्ने व्यवस्था अझ सहज र खुकुलो बनाउन स्थायी र अस्थायी प्यारापिट थपिएको छ । खेललाई विवादरहित बनाउन अन्तर्राष्ट्रिय रेफ्रीलाई निमन्त्रणा गरेका छौं । यसपल्टको मुख्य विशेषता भनेको ‘फर्स्ट रेफ्री’ मा अन्तर्राष्ट्रिय र ‘सेकेन्ड रेफ्री’ मा राष्ट्रिय रेफ्री रहने व्यवस्था गरेका छौं, जसले गर्दा प्राविधिक त्रुटि र विवाद कम हुनेछ । खेलाडी, प्रशिक्षक र व्यवस्थापक सबैलाई अनुशासन र नियमभित्र रहने प्राविधिक बैठकमा पनि हामीले विशेष जोड दिएका छौं ।

यस वर्ष महिलामा थाइल्यान्ड र पुरुषमा माल्दिभ्सको टोलीलाई पनि कोर्टमा उतार्दै हुनुहुन्छ । अन्तर्राष्ट्रिय टिमहरूको आगमनले नेपाली खेलाडीको ‘एक्सपोजर’ र प्रतियोगिताको प्राविधिक स्तर वृद्धिमा कस्तो प्रभाव पार्ने अपेक्षा गर्नुभएको छ ?

वरीयताका हिसाबले माल्दिभ्सको पुरुष राष्ट्रिय टोली र थाइल्यान्डको महिला टोली सहभागी हुँदै छ । विदेशी खेलाडीको खेल्ने शैली, रणनीति र पोजिसन नेपाली खेलाडीले नजिकबाट हेरेर सिकुन् भन्ने हाम्रो मुख्य उद्देश्य हो । सरकारी स्तरबाट मात्रै अन्तर्राष्ट्रिय टोलीसँग खेल्ने अवसर पाउन कठिन छ, त्यसैले निजी क्षेत्रका संस्थाले यस्तो पहल गर्दा खेलाडीमा हौसला बढ्छ । यसले दुई देशका खेलाडीबीच भावनात्मक सम्बन्ध र समन्वय पनि बलियो बनाउँछ । सातौं संस्करणमा हामी अझै उत्कृष्ट टोलीहरू ल्याएर नेपाली भलिबलको स्तर उकास्ने अठोटमा छौं ।

देशको वर्तमान आर्थिक अवस्था केही जटिल छ र तपाईंले प्रतियोगिताको झन्डै १ करोड ८० लाख बजेट अनुमान गर्नुभएको छ । यस्तो बेला निजी क्षेत्र र प्रायोजकलाई खेलकुदमा जोड्न कत्तिको चुनौतीपूर्ण रह्यो ?

आर्थिक संकलन पक्कै पनि जटिल विषय हो । त्यसमा पनि पारदर्शिता कायम गर्नु झनै महत्त्वपूर्ण हुन्छ । तर म खुसी छु कि टाइगर ग्रुप पोखरा पहिलो पक्ष, कान्तिपुर मिडिया ग्रुप दोस्रो पक्ष र सुश्री मिडिया प्रालि तेस्रो पक्ष भएर तीन वर्षका लागि सम्झौता भएको छ । देशको आर्थिक अवस्था जर्जर हुँदा पनि विभिन्न कर्पोरेट हाउस र सहयोगी हातहरूले टाइगर कपमाथि विश्वास गरेर स्वतःस्फूर्त सहयोग गर्नुभएको छ । संघीय, प्रदेश र स्थानीय सरकारको पनि केही लगानी छ । यद्यपि सरकारले गर्नुपर्ने काम एउटा क्लबले गरिरहँदा राज्यले अझै बजेट व्यवस्थित गरिदिए हुन्थ्यो भन्ने हाम्रो चाहना छ ।

टाइगर ग्रुपले प्रतियोगिताबाट बचेको रकम स्वास्थ्य, शिक्षा र सामाजिक क्षेत्रमा लगानी गर्ने घोषणा गरेको छ । यसको आवश्यकता किन देख्नुभो ?

हाम्रो संस्थाको विधानमै स्वास्थ्य, शिक्षा र खेलकुदलाई समेटिएको छ । हाम्रो ७०–७५ जनाको समूहमा विभिन्न क्षेत्रका विज्ञ हुनुहुन्छ । भलिबललाई निरन्तरता दिँदै गर्दा हामीले हरेक वर्ष मुटु सिविर आयोजना गर्छौं । यसमा मुटुरोग विशेषज्ञ डा. सूर्य देवकोटा, सुरक्षाका गोविन्द पुरी लगायतका व्यक्तित्वहरू जोडिनुभएको छ । दुर्गमका आमाबुवाहरूलाई निःशुल्क स्वास्थ्य सेवा दिने, शिक्षाबाट वञ्चितलाई सहयोग गर्ने र धार्मिक क्षेत्रमा पनि योगदान पुर्‍याउने हाम्रो प्राथमिकता हो ।

पोखरालाई खेलकुद पर्यटनको केन्द्र बनाउने कुरामा टाइगर कपले कसरी योगदान पुर्‍याइरहेको छ ?

पोखरा पर्यटनको राजधानी घोषणा भइसकेको छ । अब यसलाई खेलकुदको राजधानी पनि बनाउनुपर्छ । भलिबललाई ग्रासरुटदेखि नै विकास गर्न विद्यालयको पाठ्यक्रममा समावेश गर्ने र सुरुदेखि नै बजेट विनियोजन गर्ने हो भने पूर्वाधार विकासमा ठूलो सहयोग पुग्छ । हाल कभर्डहलको अभावमा हामीले आउटडोरमा खेलाउनुपरेको छ । राज्यले एकेडेमी बनाएर खेलाडीलाई रोजगारीसँग जोड्न सक्यो भने उनीहरू विदेश पलायन हुनबाट रोकिनेछन् ।