निर्वाचन आयोगले कांग्रेस पार्टीको आधिकारिकता गगन थापा पक्षलाई प्रदान गरेको छ । आयोगको शुक्रबार बसेको बैठकले विशेष महाधिवेशनलाई वैधता प्रदान गर्दै त्यसले गरेको निर्णयलाई अद्यावधिक गर्ने निर्णय गरेको हो ।

विशेष महाधिवेशनबाट निर्वाचित केन्द्रीय कार्यसमितिलाई निर्वाचन आयोगले मान्यता दिएलगत्तै कान्तिपुरसँगको संवादमा सभापति गगन थापाले अब पूर्वसभापति देउवासहित सबै  नेता, कार्यकर्तालाई समेटेर अघि बढ्ने बताएका छन्।

उनीसँगको संवादका हाइलाइट्स : 

• २८ असोजमा शेरबहादुर देउवा ‘ग्रेसफुल्ली’ जानुभएको थियो, सबैले उहाँलाई धन्यवाद दिएका थिए । त्यही निर्णयमा उहाँ अडिएर बस्नुपर्थ्यो ।
• हामी तख्ता पलट गर्छौं भनेर हिँडेको होइन, हिजोदेखि नै नेतृत्व बदल्नुपर्छ भनेर कोसिस गरिरहेका हौं । अघिल्लो महाधिवेशनमा पनि बदल्न खोजेका थियौं, संसदीय दलको नेताबाट पनि बदल्न खोजेका थियौं ।
• श्रद्धेय नेता शेरबहादुर देउवासँग के अपेक्षा छ भने पार्टीमा विशेष महाधिवेशनको निर्णय भयो, त्यसको परीक्षण हामीले बनाएको संवैधानिक संस्था निर्वाचन आयोगले दियो, हिजोसम्म जे भयो, भयो, अब सिंगो पार्टीलाई एकढिक्का बनाएर अघि बढ्न आह्वान गरिदिनुपर्छ । मलाई देउवाको आशीर्वाद चाहिन्छ, पूर्णबहादुर खड्काको शुभेच्छा पनि चाहिन्छ । पार्टीका सबै हामी एक ठाउँमै छौं, यो पार्टी विभाजन गरेर कोही गएको छैन । 
• २३–२४ भदौको आन्दोलनपछि देउवालाई मैले एकैचोटि २८ असोजमा मात्रै भेटेको हुँ। तर म टेलिफोन सम्पर्कमै थिएँ । २४ भदौमा देउवामाथि आक्रमण भएको भोलिपल्टै विश्वप्रकाश शर्मा र मैले निन्दा गरेर वक्तव्य निकाल्यौं ।
• देउवा मंसिरमा नियमित महाधिवेशन गर्न तयार हुनुहुन्थ्यो तर नाम लिएरै केही मानिसले दिएनन् भन्नुहुन्थ्यो ।
• आजबाट म नेपाली कांग्रेसको सभापति हो, अब कांग्रेसको कार्यवाहक सभापति भनेर अरू कसैले गर्ने निर्णयलाई संविधानले चिन्दैन, कानुनले चिन्दैन, विधानले पनि चिन्दैन ।
• शेरबहादुर देउवा र आरजु राणाले अब चुनाव लड्नुहुन्न भन्ने नै हो । पार्टीको प्रत्येक सदस्यले आकांक्षा राख्नु हकको विषय हो तर अब एउटा तह र पंक्तिले विश्राम लिनुपर्छ ।
• समानुपातिक उम्मेदवारको सूचीमा हाम्रो कतिपय मत मिलेन होला, तर जो पर्नुभएको छ उहाँहरू पार्टीकै हुनुहुन्छ । त्यसलाई हामीले धेरै अप्ठ्यारो मान्नुपर्ने केही पनि छैन ।
• लोकतन्त्रको पवित्रता राख्न पनि निर्वाचन अगाडि गठबन्धन गर्नु हुँदैन, यो निर्वाचनमा कांग्रेस १६५ निर्वाचन क्षेत्रमै आफ्ना उम्मेदवार लिएर जान्छ । हामी रुख चिह्नबाहेकमा मत माग्दैनौं ।
• राष्ट्रिय सभा निर्वाचनमा गठबन्धन गर्ने विषयमा पार्टीले निर्णय गरिसकेको छ, त्यसको निरन्तरता हो नि त पार्टी संस्थाहरू भनेको । प्रतिनिधिसभा र राष्ट्रिय सभालाई एकै ठाउामा राखेर हेर्नु हुँदैन ।
• शेखर कोइरालाले हिजो मात्र साथीहरू घर फर्किनुस् भनेर आह्वान गर्नुभएको थियो, अब उहाँले त्यही आह्वान गरिदिनुहुन्छ भन्ने मेरो अपेक्षा छ ।

पूरा अन्तर्वार्ता हेर्नुहोस् :