अध्यक्ष रञ्जिता श्रेष्ठले स्वास्थ्यको कारण देखाउँदै शिव बास्तोलालाई कार्यवाहक अध्यक्ष तोकेपछि नागरिक उन्मुक्तिमा आन्तरिक विवाद झन् चर्किएको छ ।

बहुमत संस्थापक केन्द्रीय सदस्यले श्रेष्ठलाई यस विषयमा स्पष्टीकरण सोधेका छन् । यसै सन्दर्भमा नागरिक उन्मुक्तिका संरक्षक चौधरीसँग गरिएको संक्षिप्त कुराकानी–

अध्यक्ष रञ्जिता श्रेष्ठले किन शिव बास्तोलालाई कार्यवाहक अध्यक्ष तोक्नुभयो ?

बास्तोलाजीलाई कार्यवाहक तोकेको जानकारी मैले सामाजिक सञ्जालबाट पाएँ । पार्टी केन्द्रीय समितिको निर्णयबिनै कार्यवाहक तोकेकाले रञ्जिताजीलाई स्पष्टीकरण सोधिएको छ । २१ सदस्यीय संस्थापक केन्द्रीय समितिमा बास्तोलाजी हुनुहुन्न । यस विषयमा रञ्जिताले स्पष्टीकरण दिएपछि थाहा होला ।

कार्यवाहक तोक्ने अधिकार अध्यक्षलाई विधानले दिएको छैन र ?

अध्यक्षले मनपरी कार्यवाहक तोक्न मिल्दैन । पार्टी विधानमा अध्यक्षले निरंकुश भएर मनपरी गर्न पाइँदैन भन्ने लेखिएको छ । पार्टीमा कुरै नगरी कार्यवाहक अध्यक्ष तोकेको विषयलाई बहुमत केन्द्रीय सदस्यले अस्वीकार गरिसकेका छन् ।

पोखराको लिची बगान जग्गा प्रकरणमा मुछिएको विषयमा अध्यक्ष श्रेष्ठले पार्टीमा जवाफ दिनुभयो ?

अध्यक्षले आफूमाथि आरोप लागेपछि पार्टीभित्र जवाफ दिनुपर्छ । उहाँ निर्दोष हो भने जवाफ दिनुपर्‍यो । निर्दोष हो भने पार्टीले पनि आरोपको प्रतिवाद गर्ला । के कति कारणले उहाँ यो प्रकरणमा मुछिनुभयो ? जवाफ दिनुपर्‍यो नि । तर उहाँले पार्टीमा जवाफ दिन चाहनुभएन । बहुमत केन्द्रीय सदस्यले बैठक बोलाउन आग्रह गर्नुभयो । तर केन्द्रीय समिति बैठक पनि बोलाउनुभएन । बैठक बोलाएर आफूमाथि लागेको आरोपको जवाफ दिन किन गाह्रो ?