काठमाडौँ — राष्ट्रिय प्रजातन्त्र पार्टीले काठमाडौंका निषेधित क्षेत्रमा प्रदर्शन गर्ने तयारी गरेपछि शनिबार गृह मन्त्रालयले विज्ञप्ति जारी गरी कडा कारबाहीको चेतावनी दिएको थियो । त्यहीअनुसार आइतबार सडकमा ठूलो संख्यामा सुरक्षाकर्मी परिचालन गर्‍यो ।सिंहदबारभित्रै प्रदर्शन गरेपछि राप्रपा अध्यक्ष राजेन्द्र लिङ्देन, वरिष्ठ उपाध्यक्ष बुद्धिमान तामाङ, प्रमुख सचेतक ज्ञानेन्द्र शाहीलगायत पक्राउ परे । उनीहरु सबै साँझ रिहा भए । राजतन्त्र, हिन्दु राज्य पुनस्थापना र संघीयता खारेजीको माग गर्दै आन्दोलनमा उत्रिएको राप्रपाले अगामी दिनमा शान्तिपूर्ण आन्दोलन जारी राख्ने अध्यक्ष लिङ्देन बताउँछन् । प्रहरीले छाडेलगत्तै लिङ्देनसँग कान्तिपुरका गंगा बीसीले गरेको संक्षिप्त कुराकानी :

राप्रपाले निषेधित क्षेत्रमा किन प्रदर्शन गर्नुपरेको ?
मुख्य रूपमा आज हामीले निषेधित क्षेत्रमा प्रदर्शन गरी सरकार र विश्व समुदायका आम जनताको ध्यान आकर्षित गर्ने कार्यक्रम बनाएका थियौं । आजको प्रदर्शन ठूलो संख्याभन्दा सन्देशमूलक होस् भन्ने थियो । हामीले निषेधित क्षेत्रमा शान्तिपूर्ण प्रदर्शन गर्ने बारम्बार भनिराखेका थियौं । हाम्रो कार्यक्रम सफल भएको छ । कतिपय साथीले निषेधित क्षेत्रमा किन गरेको, अरु क्षेत्रमा गरेको भए हुन्थ्यो भनेका छन् । सरकारको नजिकमै गएर आफ्ना कुरा सुनाऔं भनेर निषेधित क्षेत्रमा गरेको प्रदर्शन सफल भएको छ । हामीलाई साथ र सहयोग भयो ।

तपाईँको माग सरकारले सुनेजस्तो लाग्यो त ?
सरकारले हाम्रो प्रदर्शनबाट केही न केही सन्देश लिएको हुनुपर्छ । यसको छलफल र कुराकानीबाट परिणाम थाहा हुनेछ । आजको प्रदर्शन सफल भएको छ । हाम्रा मुद्दा बाँकी नै छन् । हामीले चैत १५ मा काठमाडौंको तीनकुने क्षेत्रमा भएको प्रदर्शनबाट सिर्जित घटनाको न्यायिक छानबिन हुनुपर्छ । पक्राउ परेका हाम्रा नेता र अन्यको रिहाइ होस् भन्ने कुरा प्राथमिकतामा राखेका थियौं । यसमा सरकारले यसमा विचार गर्नेछ र नागरिक समाजले ध्यान पुर्‍याउनुहुनेछ । हामी हाम्रा कार्यक्रम निरन्तर गरिराख्छौ‌ं ।

तपाईं लगायतका नेतालाई पूर्वराजा ज्ञानेन्द्र शाहले शनिबार भेट गरेको सार्वजनिक भएको छ । प्रदर्शनको अघिल्लो दिन पूर्वराजालाई किन भेट्नुभएको ? 
यो सरकार र गणतन्त्र यति कमजोर छ कि यसबारे धेरै टिप्पणी गर्न चाहन्नँ । कोही भ्रममा पर्नु पर्दैन । गणतन्त्र, धर्मनिरपेक्षता, संघीयता र अहिले लोकतन्त्रको नाममा जुन लुटतन्त्र भइरहेको छ, राष्ट्रिय प्रजातन्त्र पार्टी त्यसको निरन्तर विरोधमा छ । यो लुकाएको विषय होइन । हामी मिल्ने हो भने अहिले नै यो व्यवस्था परिवर्तन गर्ने पक्षमा छौं । यसका लागि राजालाई भेटिराख्नुपर्ने, यसका लागि छुट्टै षडयन्त्र गरिख्नुपर्ने, परिपञ्च गरिराख्नुपर्ने छैन । हामी घोषित रूपमै लामो समयदेखि यो गणतन्त्रको विरुद्धमा छौं ।

मैले बारम्बार भनेको छु, आन्दोलन शान्तिपूर्ण हुन्छ । हामी शान्तिपूर्ण ढंगले काठमाडौंमा ५०औं हजार मानिस जम्मा गरेर बालुवाटार, सिंहदरबार घेरौंला, धर्ना बसौंला । तर हामी कुनै पनि प्रकारको विध्वंस, हिंसात्मक गतिविधि गर्दैनौं । हामी हिंसात्मक गतिविधिमा भविष्य पनि देख्दैनौं ।

आगामी आन्दोलनको रूप कस्तो हुन्छ ?
हामी संसद् र सडक दुवैको उपयोग गरिरेका छौं । दुवै फोरमलाई सशक्त रूपले उपयोग गर्छौं ।

सरकारले त राप्रपा संविधान र कानुनभन्दा बाहिरका माग राखेर प्रदर्शनमा आएको भनिरहेको छ नि ?
आन्दोलनको क्रममा कति कुरा सरकारले भनेजस्तो गर्न सकिँदैन । मैले बिहान मात्र भनेँ- यति बाटो मात्र हिँड । यति मात्र बोल । यति नबोल । यति मिटरभन्दा वर नआऊ । तर यी कुरा आन्दोलमा पालना गरिँदैन । आज गरिएन । तर यो क्रममा कुनै पनि अशान्ति हुने, हिंसा हुने काम भएनन् । हामी भद्र अवज्ञाका रूपमा आन्दोलन गर्छौं ।