राष्ट्र बैंकको गभर्नर नियुक्ति, अतिरिक्त प्रहरी महानिरीक्षक (एआईजी) को बढुवा, सडकमा देखिएका विभिन्न समूहको आन्दोलन र सरकारको कार्यशैलीका विषयमा कांग्रेस नेताहरूबाट टीकाटिप्पणी हुन थालेपछि सत्ता गठबन्धनकै भविष्यमाथि संशय पैदा भएको छ ।
यसै विषयमा प्रधानमन्त्री केपी शर्मा ओली र कांग्रेस सभापति शेरबहादुर देउवाबीच मंगलबार बिहान लामो संवादसमेत भएको छ । सत्तारूढ दुई दलबीच असमझदारी देखिएकाले थप छलफल गर्न बुधबार संयन्त्रको बैठक बोलाइएको छ ।
कांग्रेसभित्र बढ्दो असन्तुष्टि र त्यसको प्रभावका विषयमा नेपाली कांग्रेस नेता एवम् गृहमन्त्री रमेश लेखकसँग गरिएको संक्षिप्त कुराकानी :
सरकारप्रति कांग्रेसभित्र असन्तुष्टि बढेको छ, सरकार परिवर्तनसम्मका हल्ला चल्न थालेका छन्, खास के भएको हो ?
सरकार परिवर्तनको कुनै सम्भावना छैन । समीकरण तलमाथि हुँदैन । सरकार बदलिहाल्छ भनेर जो लाग्नुभएको छ, त्यो पनि आवश्यक छैन ।
सरकारसँग कुन–कुन मुद्दामा कुरा नमिलेर पार्टीभित्र असन्तुष्टि देखिएको हो त ?
कुरा नमिलेको कुनै मुद्दा छैन । ठूलै समस्या आइहाल्यो भन्ने कुरा सत्य होइन ।
बाहिर चर्चा भएजस्तै सरकार परिवर्तनको कोर्स अघि बढ्ने कुनै संकेत छैन त ?
कुनै केही छैन ।
कांग्रेसभित्रको असन्तुष्टि गभर्नर आफ्नो भागमा पार्ने रणनीतिक दबाबका लागि मात्रै हो त ?
यसमा पनि असन्तुष्टि छैन । सबै काम सहमतिमै गर्छौं । गभर्नर नियुक्ति पनि सहमतिअनुसार नै हुन्छ ।
कांग्रेसको असन्तुष्टिमा राजनीतिक संयन्त्रको बैठकबाट हल खोज्ने भनेर एमालेले संस्थागत रूपमा नै भन्नुपर्ने अवस्था किन आयो त ?
हामी भाइब्रेन्ट प्रजातान्त्रिक अभ्यासमा छौं । यसमा विभिन्न कोणबाट विभिन्न कुरा उठ्छन् । त्यसैलाई आधार बनाएर सरकार ढल्छ भन्ने होइन । समीकरण र सरकारमा अहिले कुनै प्रतिकूलता उत्पन्न भएको छैन ।
