काठमाडौँ — राजावादी र प्रहरीबीच झडप हुँदा तीनकुनेमा शुक्रबार ठूलो धनजनको क्षति भयो । राजावादीहरको प्रदर्शनमा सहभागी भएका राप्रपाका वरिष्ठ उपाध्यक्ष रवीन्द्र मिश्रले प्रदर्शनमा घुसपैठ भएकाले आफ्नो सरोकार नभएको भन्दै घटनाको जिम्मेवारी लिन अस्वीकार गरे ।

आज भएको हिंसात्मक, अराजक घटनाको जिम्मेवारी कसले लिने ?

राजसंस्था पुनर्स्थापनाका लागि संयुक्त जनआन्दोलन समिति स्थापना भएदेखि नै हामीले एकदमै जोड दिएको कुरा नवीन समझदारी हो । शान्तिपूर्ण संक्रमणमार्फत नवीन समझदारीमा देश जाओस् भन्ने हो । यदि त्यो नभएको खण्डमा हामी आन्दोलनमा जानुपर्दा शान्तिपूर्ण र अहिंसात्मक होस् भनेर बारम्बार भनेका छौं ।

आजको स्थितिमा नवराज सुवेदीजी र म एउटै गाडीमा थियौं । गाडीबाट ओर्लिएर स्टेजमा जानेबित्तिकै टियर ग्यास प्रहार भयो । त्यो त सबैले देख्नुभयो होला । टियर ग्यास प्रहार भएपछि त्यहाँ उत्तेजना बढ्यो । प्रदर्शनका सिलसिलामा हामीले जे जत्ति गर्‍यौं । हामी केही प्रमुख मान्छे तीनकुनेमै सीमित रह्यौं । त्यहाँभन्दा कहीं गएको छैन । तर त्यो आन्दोलनमा जति पनि घुसपैठ भयो, जति पनि धन र जनको क्षति भयो त्यसको जिम्मेवारी सरकारले लिनुपर्छ ।

भनेपछि मान्छे तपाईंहरुले बोलाउने, ती मान्छेहरुले तोडफोड गर्ने अनि त्यसको जिम्मेवारी राज्यले लिनु पर्ने ?