काठमाडौँ — पहिचानवादी शक्ति एक हुनुपर्छ भन्ने मुख्य आधारमा जनमत र नागरिक उन्मुक्ति पार्टीबीच एकताको प्रयास भएको जनमतका महासचिव चन्दन सिंहले बताएका छन् । दुई पार्टीबीचको एकताबारे उनीसँग गरिएको छोटो कुराकानी :

जनमत र उन्मुक्तिबीच पार्टी एकताको आधार बनिसकेको हो ?

गत साता बसेको हाम्रो केन्द्रीय समिति बैठकले नागरिक उन्मुक्ति पार्टीसँग एकता गर्ने निर्णय गरेको हो । त्यही निर्णयअनुसार प्रक्रिया अघि बढेको छ । अब औपचारिक रूपमा एकता गर्ने बाटो खुलेको छ । जतिसक्दो छिटो एकता गर्ने पक्षमा हामी छौं ।

एकताको आधार के हो ?

हामी पहिचानवादी शक्तिहरू एक हुनुपर्छ भन्ने मुख्य आधार हो । पहिचानवादी, परिवर्तनकामी शक्तिहरूबीच एकता गरेपछि मात्र हाम्रा मुद्दा अघि बढाउन सकिन्छ । नागरिक उन्मुक्ति पार्टीको मूल उद्देश्य पनि पहिचानको मुद्दालाई मूर्त रूपमा अघि बढाउने भएकाले एकताका लागि आधार तयार भएको हो । मधेशी थारु, दलित, मुस्लिमको पहिचानसहित राज्यसत्तामा देखिने गरी उपस्थिति जनाउनका लागि एकता हुन लागेको हो ।

कस्तो राजनीतिक दस्ताबेज, विधान बन्दैछ त ?

एकता पूरा गरेपछि ठोस रूपमा सबै कुरा बाहिर आउनेछ । पूरै समथर मधेश तराईका मुद्दालाई केन्द्रित गरी अघि जानेछौं । मधेश, थरुहटमा आन्दोलन भयो । पहिचानवादी आन्दोलन भयो । हामी कहाँ चुक्यौं यसमा ? हाम्रो आफ्नै पहिचान र इतिहास छ । अब त्यसलाई केलाएर अघि बढ्ने मुख्य उद्देश्य हो । नागरिक उन्मुक्ति पार्टी प्रतिनिधिसभामा ४ सिट जिते पनि राष्ट्रिय पार्टी बन्न सकेन । नागरिक उन्मुक्ति राष्ट्रिय पार्टी बन्यो । त्यतिबेला मिलेर चुनाव लडेको भए हामी ठूलो राष्ट्रिय शक्ति हुने थियौं । हामीले यही राजनीतिक परिस्थितिलाई विश्लेषण गरी एक भएर जानुपर्छ भन्ने टुंगोमा पुगेका छौं । थरुहट र मधेश एक भयौं भने पहिचानवादी शक्ति भोलिको दिनमा निर्णायक शक्ति हुन्छौं । हाम्रो उद्देश्य एउटै हो, हाम्रो पीडा एउटै हो, मिलेर गयौं भने तराई मधेशका थुप्रै समस्या समाधान गर्न सकिन्छ ।