‘संसद् चल्न नदिने हो भने भंग गर्दिने र चुनावमा जाने’ : नेपाल- कुराकानी - कान्तिपुर समाचार
कान्तिपुर वेबसाईट
AdvertisementAdvertisement

‘संसद् चल्न नदिने हो भने भंग गर्दिने र चुनावमा जाने’ : नेपाल

‘संसद् चल्नै दिएनन् । संसद् चल्न नदिएपछि त्यत्तिकै तलबभत्ता सोहोर्ने ? ’
कान्तिपुर संवाददाता

काठमाडौँ — सत्ता गठबन्धनमा रहेका प्रमुख तीन दलका शीर्ष नेताले राजनीतिक सहमति जुटे वैशाख/जेठमा संसदीय र नजुटे स्थानीय तहको चुनावमा जाने समझदारी गरेका छन् ।

प्रधानमन्त्री एवं कांग्रेस सभापति शेरबहादुर देउवा, माओवादी केन्द्रका अध्यक्ष पुष्पकमल दाहाल र एकीकृत समाजवादीका अध्यक्ष माधवकुमार नेपालबीच बिहीबार तेस्रो विकल्पका रूपमा तीनवटै चुनाव एकै पटक गर्ने विषयमा समेत छलफल भएको छ । यसै सन्दर्भमा एकीकृत समाजवादीका अध्यक्ष माधवकुमार नेपालसँग गरिएको कुराकानी :

तपाईं, प्रधानमन्त्री र माओवादी केन्द्रका अध्यक्षबीच बालुवाटारमा बिहीबार के विषयमा छलफल भयो ?

केपी ओलीले यसै पनि पहिला दुई पटक संसद्को हत्या गरेकै हुन् । अहिले पनि संसद् चल्न दिँदैनन् । तलबभत्ता सबै सोहोर्न खोज्छन् र संसद् चलेन भन्छन् । यतिबेला देश र जनताको समस्याबारे संसद्मा व्यापक छलफल गर्नुपर्ने हो । तर प्रतिगामी रबैया कायमै छ । ओलीको रबैया संसद्विरोधी, संविधानविरोधी, अग्रगमनविरोधी हो । उनलाई नै संसद् चाहिएको छैन भने यस्तो प्रमुख प्रतिपक्ष देशलाई घाँडो भयो । संसद् चल्न नदिने हो भने भंग गर्दिने र चुनावमा जाने हुन्छ । अरू उपाय नै छैन भन्ने भयो ।

मुखैमा आउन लागेको स्थानीय निर्वाचनको मिति तय गर्ने बेला संसद् भंगको प्रस्ताव व्यावहारिक छ ?

संसद् चल्न नदिने भएपछि के गर्ने ? अहिले ओलीले गर्दा संसद् घाँडो भयो । संसद् ल्याउने संसदीय व्यवस्था असफलसिद्ध भयो भनेर प्रतिगामीलाई मद्दत पुग्ने काम ओलीहरूले गरेका छन् ।

पहिला संघको निर्वाचन गर्ने पुष्पकमल दाहालको प्रस्तावमा व्यापक आलोचना भयो नि ?

केही आलोचना हुँदैन । पहिला पनि स्थानीय तहको निर्वाचन तीनवटा मितिमा भएको थियो– वैशाख ३१, असार १४ र असोज २ गते । संविधानमा गाउँसभा/नगरसभाको कार्यकाल समाप्त भएको ६ महिनाभित्र चुनाव गर्ने लेखेको छ । तर कानुनमा अर्कै व्यवस्था भइदियो । यो मिलेको छैन । अर्कातर्फ प्रतिनिधिसभा चल्नै सकेन भने किन चुनावमा नजाने ? एकैचोटि चुनाव गर्नु उपयुक्त हुन्छ ।

पहिला स्थानीय तहको निर्वाचन गर्न तपाईंहरूलाई के अप्ठ्यारो हो ?

एकै पटक निर्वाचन गर्ने निर्णय भएको छैन । यो प्रस्ताव हो । यसबारे सबै पार्टीसँग छलफल गर्छौं ।

केपी ओलीले गरेको प्रतिनिधिसभा विघटनलाई प्रतिगामी कदम भन्नुभयो । अहिले तपाईंहरू त्यही बाटामा हिँड्न खोजिरहनुभएको छ नि ?

संसद् चल्नै दिएनन् । संसद् चल्न नदिएपछि त्यत्तिकै तलबभत्ता सोहोर्ने ?

संसद् खुलाउन सरकार र सत्ता गठबन्धनको पनि जिम्मेवारी हुँदैन र ?

धेरै प्रयास भयो । प्रधानमन्त्री देउवाजी बालकोट (ओली निवास) मै जानुभयो । त्यति गर्दा पनि टेर्दैनन् भने ओलीलाई कसले सम्झाउने ? अब जनतामा जान दिनुपर्छ, अरू केही उपाय छैन । दण्ड दिएर प्रतिपक्षमा झार्नुपर्छ, त्यसपछि बल्ल तह लाग्छन् ।

प्रकाशित : माघ ७, २०७८ ०७:४७
प्रतिक्रिया
पठाउनुहोस्

मेदभेदेभ तेस्रो चरणमा

एएफपी

मेलबर्न — रुसी खेलाडी डानियल मेदभेदेभले निक किर्गियोसलाई सजिलै हराएर बिहीबार अस्ट्रेलियन ओपनको तेस्रो चरण सुरक्षित गरेका छन् । तर स्पेनकी गार्बिन मुगुरुजा र बेलायतकी इमा राडुकानु भने त्यतिकै भाग्यमानी रहेनन् । उनीहरू प्रतियोगिताबाट बाहिरिने ठूला नाम रहे । यस्तै चाँडै घर फर्किन बाध्य अर्को ठूलो खेलाडी एन्डी मरे रहे । पूर्व विश्व नम्बर एक खेलाडी मरे जापानका क्वालिफायर तारो डानियलविरुद्ध सोझो सेटमा पराजित भए । प्रतियोगिता आफै भने आरामले चौथो दिन प्रवेश गर्न सफल रह्यो ।

दोस्रो नम्बरका मेदभेदेभ प्रतियोगितामा कायम रहेका उच्च वरीयताका खेलाडी हुन् । विश्व नम्बर एक तथा डिफेन्डिङ च्याम्पियन नोभाक जोकोभिच प्रतियोगिता खेल्नबाट वञ्चित भएपछि रुसी खेलाडी नै उपाधिको बलिया दाबेदार देखिएका छन् । तर २५ वर्षीय उनले दोस्रो चरणमै प्रतिभाशाली तथा घरेलु खेलाडी किर्गियोसको सामना गर्नुपरेको थियो । यसअघि २६ वर्षीय अस्ट्रेलियाली किर्गियोसले यूएस ओपन विजेता र गत वर्ष मेलबर्नका उपविजेता मेदभेदेभलाई दुईपल्ट हराएका थिए ।

रड लेभर कोर्टमा किर्गियोसले फेरि एकपल्ट मेदभेदेभविरुद्ध बलियो चुनौती पेस गर्ने प्रयास गरे, तर यो पर्याप्त रहेन । यस्तोमा निकै लेखाजोखा गरेर खेलेका मेदभेदेभले ७–६, ६–४, ४–६, ६–२ ले नतिजा निकाले । दर्शकले आफूप्रति देखाएको व्यवहारपछि मेदभेदेभ खुसी रहेनन् । उनले भने, ‘म यो खेल जित्न आएको थिएँ, जितें पनि । यसमा म खुसी छु । तर दर्शकको व्यवहार मेरो हातमा थिएन । दर्शकको चर्को विरोधबीच खेल्न सजिलो भने हुन्न ।’

पहिलो ठूलो उपाधि जित्ने प्रयासमा रहेको ग्रिसका चौथो वरीयताका स्टेफानोस सिसिपासले पूर्व जुनियर विश्व नम्बर एक अर्जेन्टिनी खेलाडी सेवास्टिन बेजलाई ७–६, ६–७, ६–३, ६–४ ले पराजित गरे । जितपछि उनले भने, ‘यो खेल निकै गाह्रो भयो, मैले जितका लागि कडा संघर्ष गर्नुपर्‍यो । अहिले म तेस्रो चरण पुगेको छु र यसमा म खुसी नै छु ।’

यस्तै सौभाग्य बेलायती मरेले प्राप्त गरेनन् । तीनपल्टको ग्रान्ड स्लाम उपाधि विजेता उनी १ सय २० औं वरीयताका डानियलसँग ६–४, ६–४, ६–४ ले पराजित भए ।

प्रतियोगिताको महिलातर्फ स्तब्धपूर्ण नतिजाको शृंखला नै रह्यो । तेस्रो वरीयताकी मुगुरुजा, यूएस ओपन च्याम्पियन राडुकानु र छैटौं वरीयताका एनेट कोन्टाभेट पराजित रहे । मेलबर्नमा डेब्यु गरिरहेकी १७ औं वरीयताकी १९ वर्षीया राडुकानु मोन्टेनेग्रोकी डान्का कोभिनिचविरुद्ध ६–४, ४–६, ६–३ ले पराजित रहिन् । डब्लूटीए फाइनल विजेता मुगुरुजाले भने एलिज कोर्नेटविरुद्धको खेल ६–३, ६–३ ले गुमाइन् ।

जितपछि अनुभवी कोर्नेटले प्रतिक्रिया दिइन्, ‘यो टुरमा म डाइनोसर जस्तै भइसकेकी थिएँ ।’ शनिबार मात्रै उनले आफ्नो ३२ औं जन्मदिन मनाएकी थिइन् । उपाधिको एक दाबेदार मानिएका कोन्टाभेटले २७ अनावश्यक गल्ती गरिन् र त्यसको मूल्य चुकाउँदै डेनिस किशोरी क्लारा टाउसनविरुद्धको खेलमा ६–२, ६–४ को हार आत्मसात् गरिन् । दोस्रो वरीयताकी आर्येन सवालेन्काले एक अर्को संघर्षपूर्ण खेल खेल्दै चीनकी वाङ सिन्युलाई १–६, ६–४, ६–२ ले हराइन् ।

प्रकाशित : माघ ७, २०७८ ०७:४२
पूरा पढ्नुहोस्
प्रतिक्रिया
पठाउनुहोस्
×