अछाम — कैलाश खोलामा २०७७ भदौ २ मा आएको बाढीले अछामको पुरानो सैनी बजार उजाड बनायो। १७ जनाको मृत्यु भयो। खोलाको झोलुंगेपुल बगायो । बाढीले पर्यटकीय क्षेत्र रामारोशनलाई जोड्ने सडकको नामोनिशाना मेटायो । आसपासका खेतियोग्य जमीन सबै बगायो ।

खोला किनारको उक्त सडक र पुल अझै बन्न सकेको छैन, जसका कारण वारि र पारि रहेका गाउँहरुमा आवातजावत गर्न कठीनाइ छ ।

स्थानीयले खोलामा अस्थायी काठे पुल बनाएका छन् । त्यही पूलबाट हिँड्डुल गर्छन् बान्नीगढी जयगढ गाउँपालिका–६ पाटेखेतका स्थानीय । तर बालबालिकादेखि वृद्धवृदालाई काठेपुलबाट खोला पार गर्न जोखिम भएको स्थानीय बताउछन् । विशेषगरी खोलापारि रहेको विद्यालय जान विद्यार्थीले दैनिक जोखिम मोल्नुपर्ने बाध्यता छ ।

घरबाट करिब २ घण्टाको दूरीमा रहेको ऐश्वर्य मावि दर्ना जानुपर्ने र पानी परेको दिन खोला तर्न नसक्दा पढाई छुट्ने गरेको ११ वर्षीया सीता थापाले बताइन् । ‘वर्षायाममा यहाबाट जान सकिँदैन भनेर स्कुल छेउमै बस्छौं,’ उनले भनिन् । पाटेखेतकै १० वर्षीया लक्ष्मी थापालाई पनि पानी परेको दिन स्कुल छुट्ने पीरले सताउँछ । ‘पानी परेको दिन खोला तर्न सकिदैन । पढाइ नै छुट्छ । अरु बेला पनि हिँड्न गाह्रो छ,’ उनले भने ।