धनगढी —  

सुदूरपश्चिम प्रदेश सरकार हालसम्मकै सबैभन्दा ठूलो आकारको बजेट ल्याउने तयारी गरिरहेको छ। प्रदेश सरकारले सोमबार बजेट प्रस्तुत गर्नुपर्ने भए पनि आइतबार मध्यान्हसम्म आन्तरिक छलफलमै व्यस्त थियो। अन्तिम समयमा मन्त्री फेरबदल भएको र बजेटको आकार बढाउने दबाबका कारण बजेट निर्माणको तयारीमा ढिलाइ भएको हो।

बजेट स्रोत अनुमान समितिका सदस्यसमेत रहेका प्रदेश नीति तथा योजना आयोगका सदस्य नृपबहादुर सुनारले भने, ‘यसपालिको बजेटको आकार अलि बढेरै आउँछ होला।’ चालु आर्थिक वर्षमा सुदूरपश्चिमले ३१ अर्ब ६२ करोड ९८ लाख रुपैयाँको बजेट ल्याएको थियो।

बजेटको आकार वृद्धि गर्न सरकारले चालु आर्थिक वर्षको बजेटमा हुने बचतलाई मुख्य आधार बनाएको आर्थिक मामिला मन्त्रालयका एक अधिकृतले बताए। चालु आर्थिक वर्षको बजेटबाट कम्तीमा ८ अर्ब रुपैयाँ बचत हुने अनुमान रहेको प्रदेश नीति तथा योजना आयोगका सदस्य सुनारले बताए। बजेटको आकार वृद्धिको अर्को आधार आन्तरिक राजस्वमा चालु आर्थिक वर्षभन्दा वृद्धि हुने अपेक्षा रहेको बजेट निर्माणमा संलग्न अधिकारीहरूको भनाइ छ। वन स्रोतका कच्चा पदार्थ, गिट्टी-बालुवालगायतबाट पनि थप राजस्व आउने आकलन गरिएको ती अधिकृतले बताए। चालु आर्थिक वर्षमा सरकारले आन्तरिक राजस्वबाट कुल १ अर्ब ६५ करोड रुपैयाँ संकलन हुने अनुमान गरेको थियो। सोमबार अपराह्न प्रदेशसभामा बजेट पेस गर्ने समय निर्धारण गरिएको छ।

अर्कोतर्फ सुदूरपश्चिममा पाँच दिनअघि मन्त्रिपरिषद् हेरफेर भएको थियो। त्यस क्रममा आर्थिक मामिला मन्त्रीसमेत फेरिएका थिए। यसअघि मन्त्री रहेका बहादुरसिंह थापाले गरेको बजेट तयारीलाई नवनियुक्त मन्त्री विक्रमसिंह धामीले पुनर्लेखन सुरु गरेपछि ढिलाइ भएको बजेट निर्माणमा संलग्न आर्थिक मन्त्रालयका अधिकृतहरूले बताएका छन्। ‘पुराना मन्त्रीले तयारी गरेका आयोजना र बजेट नयाँ मन्त्रीले पूरै हेरफेर गर्नुभएको छ,’ एक अधिकृतले भने, ‘मन्त्री फेरिएका अन्य मन्त्रालयमा पनि त्यही अवस्था भएकाले ढिलाइ भइरहेको छ। सोमबार दिउँसोसम्म तयारी पूरा होला।’

आर्थिक मामिलासहित कांग्रेसले नेतृत्व गरेका सामाजिक विकास मन्त्रालय र उद्योग, पर्यटन, वन तथा वातावरण मन्त्रालयमा पनि मन्त्री फेरबदल भएका थिए। सामाजिक विकास मन्त्री रहेका मेघराज खड्काको ठाउँमा कांग्रेसकै बेलबहादुर राना मगर नियुक्त भएका थिए भने उद्योग, पर्यटन, वन तथा वातावरण मन्त्री रहेका शिवराज भट्टको स्थानमा मानबहादुर रावल नियुक्त भएका थिए।