दार्चुला — महाकाली करिडोरअन्तर्गतको दार्चुला–टिंकर सडक खण्डको दुम्लिङमा गाडी पुगेका छन् । नेपाली सेनाले निर्माण गरिरहेको उक्त सडक खण्डको दुम्लिङमा शनिबार सडकको ट्याक खोलिएसँगै साना सवारी साधन पुगेका हुन् ।

ब्यास गाउँपालिका–२ दुम्लिङसम्म पहिलो पटक गाडी पुगेका हुन् । सेनाले सडक स्तरोन्नतिको काम गरिरहेकै क्रममा शनिबार निर्माण सामग्री बोकेका ट्याक्टर र जिप दुम्लिङ पुगे । सेनाले निर्माण गरिरहेको उक्त सडकको ब्यास गाउँपालिका–३ तुसारपानीबाट सुरु हुन्छ । उक्त ठाउँदेखि १२ किलोमिटर दूरीमा दुम्लिङ गाउँ छ । सेनाले उक्त सडक खण्डमा तुसारपानीदेखि २२ किलोमिटर बढीको ट्याक खोलिए पनि गाडी भने १२ किलोमिटरसम्म गुड्न सक्ने सेनाले जनाएको छ ।

नेपाल–चीन सीमा क्षेत्रसँग जोडिएको व्यास क्षेत्र भौगोलिक रूपमा अत्यन्त विकट मानिन्छ । वर्षौंदेखि यहाँका नागरिकले पैदलको भरमा यात्रा गर्नुपर्ने बाध्यता भोग्दै आएका थिए । सडक विस्तारसँगै स्थानीय बासिन्दाको जीवनस्तरमा सुधार आउने विश्वास गरिएको छ ।

ब्यास गाउँपालिका–२ को कल्जुपछीअगाडि दुम्लिङ गाउँमा सडक सञ्जालसँग जोडिएपछि स्थानीय हर्षित भएको ब्यास गाउँपालिका–२ का वडाध्यक्ष धीरनसिंह बुढाथोकीले बताए । उनले सेनाले निर्माण गरिरहेको सडकअन्तर्गत तल्लो दुम्लिङ–घट्ट क्षेत्रसम्म गाडी पुगेको छ । वर्षौंदेखि सडक पहुँचको प्रतिक्षामा रहेका ब्यास क्षेत्रका नागरिकका लागि यो महत्त्वपूर्ण उपलब्धि रहेको उनको भनाइ छ ।

दुम्लिङसम्म सडक सञ्चालनसँगै दैनिक उपभोग्य सामग्री ढुवानी, बिरामीको आवतजावत तथा शिक्षा र अन्य सेवा सुविधामा सहजता आउने अपेक्षा गरिएको छ । नेपाली सेनाले निर्माण गरिरहेको तुसारपानी–टिंकर सडकअन्तर्गत शून्य विन्दु तुसारपानीदेखि दुम्लिङसम्मको १२ किलोमिटर सडक निर्माण सम्पन्न गरेपछि यातायात सञ्चालन भएको हो । नेपाली सेनाका अनुसार तुसारपानीदेखि टिंकरसम्म निर्माणाधीन कुल ७९ किलोमिटर सडकअन्तर्गत हालसम्म २२.१५ किलोमिटर सडकको ट्रयाक खोल्ने कार्य सम्पन्न भएको छ ।

नेपाल–चीन सीमा क्षेत्रसँग जोडिएको ब्यास क्षेत्र भौगोलिक रूपमा अत्यन्त विकट मानिन्छ । वर्षौंदेखि यहाँका नागरिकले पैदलमार्गको भरमा यात्रा गर्नुपर्ने बाध्यता भोग्दै आएका थिए । सडक विस्तारसँगै स्थानीय बासिन्दाको जीवनस्तरमा सुधार आउने विश्वास गरिएको छ ।

दुर्गम हिमाली क्षेत्र जोड्ने रणनीतिक महत्त्वको यस सडकले व्यास क्षेत्रका स्थानीयलाई यातायात, स्वास्थ्य, शिक्षा तथा दैनिक उपभोग्य सामग्री ढुवानीमा सहज हुने अपेक्षा गरिएको छ । स्थानीयवासीले दुम्लिङसम्म सडक र सवारी पुगेपछि दशकौंदेखिको यातायात समस्यामा राहत मिल्ने विश्वास व्यक्त गरेका छन् । 

नेपाली सेनाले आर्थिक वर्ष २०७७/७८ देखि उक्त सडक निर्माण अघि बढाउँदै आएको हो । हिमाली तथा चट्टानी भूभागमा कठिन परिस्थितिका बीच सडक निर्माण भइरहेको सेनाले जनाएको छ । रणनीतिक तथा विकासका दृष्टिले महत्त्व बोकेको यस सडकले सीमा क्षेत्रका बासिन्दालाई राष्ट्रिय सडक सञ्जालसँग जोड्ने अपेक्षा गरिएको छ ।