दार्चुला — अभिभावकसँगै विद्यार्थीहरु यार्सागुम्बा संकलनका लागि लेकतिर हिँडेपछि अपिहिमाल गाउउँपालिका विद्यालय दुई साताका लागि बन्द गरिएका छन् । आइतबारदेखि लागु हुने गरी अपिहिमालका सामुदायिक विद्यालय १५ दिनका लागि बन्द गरिएको हो । 

स्थानीयको आम्दानीको प्रमुख स्रोत यार्सागुम्बा संकलनका लागि अभिभावकसँगै विद्यार्थीहरु लेकतिर हिँड्न थालेपछि गाउँपालिकाले विद्यालय बन्द गर्ने निर्णय गरेको हो । गाउँपालिकाका शिक्षा शाखा अधिकृत मदनराज जोशीका अनुसार वैशाख २७ देखि पालिकाभरिका विद्यालय १५ दिनका लागि बन्द गरिनेछ । उनले बर्खे बिदाबाट मिलान हुने गरी विद्यालय बन्द गर्न लागिएको जनाए ।

आम्दानीको मुख्य स्रोत नै यार्चागुम्बा भएकाले यो सिजनमा हिँड्न सक्ने जति बालबालिका तथा बृद्धबृद्धा लेकतिर जान्छन् । विद्यालय बन्द भएपछि विद्यार्थीसँगै शिक्षक पनि यार्सा पाटनतिर जाने गरेका छन् । 
गाउँपालिका शिक्षा शाखाले शुक्रबार सूचना जारी गर्दै बन्द भएका विद्यालय आगामी जेठ १० देखि पुन: सञ्चालनमा आउने जनाएको छ । अपिहिमाल गाउँपालिकाभर रहेका २२ सामुदायिक विद्यालयमा करिब ११ सय विद्यार्थी अध्ययनरत छन् । तीमध्ये अधिकांश विद्यार्थी अभिभावकसँगै यार्सागुम्बा तथा अन्य जडीबुटी संकलनका लागि लेकतिर जाने गरेका छन् ।