टीकापुर क्षेत्रका केही व्यापारीले गुल्मको गेट तोडफोड गर्दै ब्यारेकभित्र प्रवेश गरेर गुल्मपति पौडेलमाथि बुधबार हातपात गरेका हुन् ।
धनगढी — कैलालीको टीकापुरस्थित खक्रौला भन्सारमा रहेको सशस्त्र प्रहरीको सीमा सुरक्षा गुल्ममा गएर स्थानीय व्यापारीले डीएसपी प्रदीप पौडेलमाथि हातपात गरेका छन् ।
टीकापुर क्षेत्रका केही व्यापारीले गुल्मको गेट तोडफोड गर्दै ब्यारेकभित्र प्रवेश गरेर गुल्मपति पौडेलमाथि बुधबार हातपात गरेका हुन् ।
स्थानीयका अनुसार सशस्त्रले भारतबाट ल्याइएको सामान बरामद गरेको भन्दै आक्रोशित भएका व्यापारीहरुको समूह गुल्मको गेट तोडफोड गर्दै ब्यारेकभित्र पसेको थियो । समूहमा १५ जना बढी रहेको स्थानीयले बताएका छन् ।
गुल्मका सुरक्षाकर्मीले मंगलबार एक व्यापारीले भन्सार छली गरेर भारतबाट ल्याएको ५६ हजार बढी रुपैयाँ बराबरको सामान बरामद गरेको सशस्त्र प्रहरी सुदूरपश्चिम बाहिनीका एक अधिकृतले बताए । ‘सशस्त्रले भन्सार छलीमा कडाई गर्दै आएको थियो । त्यही कारण राजस्व छली गर्दै आएका व्यापारीहरु सशस्क्रसँग अलि अगाडिदेखि आक्रोशित थिए,’ बाहिनीका ती अधिकृतले भने ‘त्यसै क्रममा अकस्मात उक्त समूह ब्यारेकभित्र घुसेर डीएसपीमाथि हातपात गरेको हो ।’
सशस्त्र प्रहरी सुदूरपश्चिमका निमित्त बाहिनीपति दिग्विजय सुवेदीले घटनाको छानबिन गर्न एसपी अनिल कार्कीको संयोजकत्वमा तीन सदस्यीय समिति गठन गरिएको बताए । सुवेदीले उक्त गुल्ममा कार्यरत पूरै टोली फेरबदल गर्न लागिएको बताएका छन् ।
