डोटी — निर्वाचन आचारसंहिताका कारण रोकिएको फूलौटी होली आज मनाइएको छ । डोटीको पूर्वीचौकी गाउँपालिकामा शुक्रबार उत्साहका साथ फूलौटी होली मनाइएको हो ।

१८ फागुनमा नै होली पर्व परे पनि निर्वाचन आचारसंहिताका कारण उक्त दिन कार्यक्रम गर्न नसकिएको र शुक्रबार मनाइएको पूर्वीचौकी गाउँपालिकाका अध्यक्ष रामप्रसाद उपाध्यायले बताए ।

होली पर्व हिन्दू धर्मावलम्बीहरूले असत्यमाथि सत्यको विजय तथा आपसी सद्भाव र भाइचाराको प्रतीकका रूपमा मनाउने गरिन्छ छ । धार्मिक मान्यताअनुसार भक्त प्रह्लादलाई जलाउन खोज्दा होलिका दहन भएको घटनाको सम्झनामा यो पर्व मनाउने गरेको विश्वास छ । यही सन्देशका साथ नेपालका विभिन्न स्थानमा होली रंग र अबिर खेलेर मनाइने गरिन्छ भने सुदूरपश्चिमका केही जिल्लामा भने परम्परागत शैलीमा फूलौटी होली मनाउने चलन छ।