धनगढी — कांग्रेसले ०७९ को निर्वाचनमा तत्कालीन माओवादी केन्द्र र एकीकृत समाजवादीसँग गठबन्धन गरेको थियो । गठबन्धनबीच भागबण्डाका क्रममा अछाम–१ एकीकृत समाजवादीको भागमा परेपछि कांग्रेस कार्यकर्ता रुष्ट बनेका थिए । यस्तो असन्तुष्टिले चुनावी नतिजा प्रभावित हुने आशंका बढेपछि तत्कालीन कांग्रेस सभापति शेरबहादुर देउवा अछाम पुगे ।

त्यहाँका स्थानीय नेता–कार्यकर्तासँग प्रत्यक्ष भेटघाट र संवाद गरे । आफ्ना कार्यकर्तालाई गठबन्धनका साझा उम्मेदवारको पक्षमा एक हुन आग्रह गरे । शीर्ष नेताको उपस्थिति र आग्रहपछि चुनावी माहोल बन्नुका साथै गठबन्धनका उम्मेदवार विजयी भएका थिए ।

यसपटक सुदूरपश्चिममा कांग्रेसको चुनावी अभियान फरक देखिन्छ । गठबन्धन नभएकाले यसपटक प्रदेशका सबै निर्वाचन क्षेत्रमा कांग्रेसका उम्मेदवार छन्, तर सुदूरपश्चिममा सधैँ देखिने देउवाको उपस्थिति छैन । 

कतिपय कांग्रेस समर्थक अझै मैदानमा देउवाको प्रतीक्षामा छन् । पूर्वसभापतिनिकट कार्यकर्ताका अनुसार देउवा अहिलेसम्म चुनावी अभियानमा संलग्न नहुने मनस्थितिमा छन् । गृह जिल्ला डडेलधुरामा समेत नजाने ‘मुड’मा देउवा छन् ।

‘हालै भेट्दा उहाँ निकै दुःखी र रुष्ट हुनुहुन्थ्यो,’ देउवा समर्थक नन्दकृष्ण जोशीले भने, ‘उहाँ यसरी नै मौन रहने हो भने सुदूरपश्चिममा कांग्रेसको चुनावी नतिजामै फरक पर्ने देखिन्छ ।’