बझाङ — बिहीबार साँझ बित्थडचिर गाउँपालिका वडा नं–७ लउँणसा गाउँ रत्यौलीमा रम्दै थियो । १० परिवार ब्राह्मण समुदायको बसोबास रहेको लउँणसामा छिमेकी गाउँबाट आफ्न्त र इस्टमित्र भेला भएका थिए ।

दुलही भित्र्याउने तयारीमा नाचगानमा झुमिरहेका स्थानीयले राति साढे सात बजेतिर खबर सुने, ‘पुर्चौडीमा जन्ती बोकेको बस खस्यो, आठ जनाको मृत्यु भयो ।'

राम रमिताको माहोल एकाएक स्तब्ध भयो ।

‘गाउँका प्रायजसो पुरुषहरु जन्तीसँगै गएका थिए,' स्थानीय शंकरदत्त जोशीले भने, ‘खबर सुने पनि गाउँ भएकाहरु पनि गाडी खोजेर दुर्घटनास्थल तर्फ गयौं ।'

बैतडी पुर्चौडी नगरपालिका– ७ भौन्याँबाट स्थानीय माधव जोशीका लागि दुलही लिन गएका बस दुर्घटनामा परेपछि बझाङ जिल्ला नै शोकमग्न बनेको छ । लउँणसा गाउँका सबै घरले आफन्त गुमाएका छन् । यहाँका १० मध्ये आठ घरले परिवारका सदस्य गुमाएका छन् । बाँकी दुई घरका सदस्य पनि सख्त घाइते भएर उपचाररत छन् । शंकरदत्त भन्छन, ‘हाम्रो त सर्वस्व सकियो, केही बाँकी रहेन ।'

यहाँ बाबु–छोरा, सहोदर दाजुभाइ, भतिज र ज्वाइँसहित १३ जनाको मृत्यु भएको छ । दुर्घटनामा ज्यान गुमाउने नरेन्द्रराज जोशी र विष्णुदत्त जोशी सहोदर दाजुभाइ हुन् । उनीहरू दुवै बेहुलाका सहोदर काका हुन् । नरेन्द्रराज बित्थडचिर गाउँपालिकाका प्राविधिक सहायक हुन् भने विष्णुदत्त बित्थ्यडचिरकै महादेव माध्यमिक विद्यालयका शिक्षक हुन् । ज्यान गुमाउने वसन्तराज जोशी दार्चुला कृषि प्राविधिक पदमा कार्यरत थिए । घटनामा ज्यान गुमाउने जयपृथ्वी नगरपालिका–७ का वसन्तराज रताला मृतक वसन्तराज जोशीका सहोदर भिनाजु हुन् । मोहनदेव भट्ट र केशवराज भट्ट बुबा–छोरा हुन् । दुलहीका सहोदर भाइ सुशील जोशीले पनि घटनामा ज्यान गुमाएका छन् । ‘जन्ती पर्खिरहेको गाउँ मलामी जानुपर्‍यो,' स्थानीय चक्र अधिकारी भन्छन्, ‘एक दुई जना भए पनि हुन्थ्यो । सिंगै गाउँ नै दुर्घटनामा सकियो ।' उनले गाउँमा कसैले कसैलाई सान्त्वना दिन सक्ने अवस्था पनि नभएको बताए । 

दुर्घटनामा परेर ज्यान गुमाउने ४० वर्षीय केशवराज जोशी, १३ वर्षीय अशोकराज जोशी, विसनदत्त जोशी, २७ वर्षीय दिपकराज जोशी, ४५ वर्षीय किसनदत्त जोशी पनि लउँणसा गाउँकै हुन् । ‘आफन्त नगुमाउने घर कोही पनि रहेन,' बित्थडचिरका स्थानीय तेज बोहराले भने, ‘पूरै गाउँमा बज्रपात भए जस्तो भयो ।' घटनामा बेहुलाका काकाको खुट्टा भाँचिएको छ भने ठूलो बुबा पनि घाइते भएका छन् । दुर्घटनामा १८ महिला र २७ पुरुष गरी जम्मा ४५ जना घाइतेको उद्धार गरिएको थियो ।