बझाङ — फागुन २१ मा हुने प्रतिनिधि सभा निर्वाचनका लागि बझाङमा सात दलका सात जनाको उम्मेदवारी परेको छ । विभिन्न पार्टीबाट उम्मेदवारी दिएकाहरूमा पाँच जना नयाँ अनुहार चुनावी मैदानमा उत्रिएका छन् भने महिलाको उम्मेदवारी शून्य छ । 

बझाङमा नेकपा एमालेका ऐनबहादुर महर र राप्रपाका विश्वप्रकाश जेठाराबाहेक सबै नयाँ अनुहार हुन् । एमालेका महर २०७९ सालको निर्वाचनमा नेकपा एकीकृत समाजवादीका भानुभक्त जोशीसँग पराजित भएपछि दोस्रो पटक चुनावी प्रतिस्पर्धामा उत्रिएका हुन् । जेठाराको भने चुनावी प्रतिस्पर्धा यो पाँचौं अनुभव हो । उनी २०६४ सालको संविधान सभा निर्वाचनदेखि लगातार प्रत्येक निर्वाचनमा उम्मेदवारका रूपमा चुनावी मैदानमा छन् । 

नेपाली कांग्रेसका प्रकाश स्नेही, नेपाली कम्युनिस्ट पार्टीका मीनबहादुर कुँवर, राष्ट्रिय स्वतन्त्र पार्टीका शैलेशकुमार सिंह, नेत्रविक्रम चन्द नेतृत्वको माओवादीका भरत मल्ल र नेपाल मजदुर किसान पार्टीका दलबहादुर धामी सबै नयाँ अनुहार हुन् । 

कांग्रेसका सहमहामन्त्रीसमेत रहेका स्नेही २०७४ सालमा समानुपातिक सांसद भए पनि प्रत्यक्ष निर्वाचनमा पहिलो पटक होमिन लागेका हुन् भने एमाले र माओवादी मिलेर बनेको नेकपाका जिल्ला अध्यक्षसमेत भइसकेका कुँवरको पनि यो पहिलो चुनावी अनुभव हो । सफल व्यवसायीका रूपमा परिचित रास्वपाका सिंह पनि पहिलो पटक चुनावी प्रतिस्पर्धामा आएका हुन् ।

युद्धकालदेखि नै पार्टीमा सक्रिय रहे पनि चन्द नेतृत्वको पार्टीमा रहेर पटक–पटक चुनाव बहिष्कार गरेका भरत मल्ल पनि अहिले जनमत परीक्षण गर्न निर्वाचनमा होमिएका छन् । मजदुर किसान पार्टीका धामी पनि बझाङका लागि नयाँ अनुहार हुन् । 

निर्वाचनको अनुभव लिइसकेका एमालेका महर र नयाँ अनुहारबीचको प्रतिस्पर्धा यसपटक रोचक हुने देखिन्छ । सात जना उम्मेदवार भए पनि कांग्रेस, एमाले, नेकपा र रास्वपाका उम्मेदवारबीच प्रतिस्पर्धा हुने विश्लेषण जिल्लामा गर्न थालिएको छ ।