कञ्चनपुर — बेदकोट नगरपालिका–३ आशापुरस्थित मुक्त कमैया बस्तीका हरेक घर अगाडि एक/दुई बाँस र खरले बनाएका छाप्रा प्लाष्टिकले ढाकिएका छन् ।

स्थानीयले कात्तिकदेखि घर छेउमा यस्ता संरचना बनाएका हुन् । आशापुरस्थित मुक्त कमैया बस्तीमा अहिले घरघरै च्याउ उत्पादन गरिरहेका छन्। च्याउ बेचेरै मुक्त कमैया परिवारले चार/पाँच महिनामा डेढ/दुई लाख रुपैयाँसम्म आम्दानी गर्छन्। 

रामदुलारी डगौंरा च्याउ उत्पादन गर्ने मध्येकी एक हुन् । उनी १५ वर्षदेखि च्याउ उत्पादन गरेर बिक्री गरिरहेकी छिन् । उनले च्याउ उत्पादनकै लागि दुई वटा छाप्रा बनाएकी छिन् । एउटामा दुई/अढाई सय पोका च्याउ राख्छिन् । ‘एक लट त काक्तिकमै राखेर बेचिसके,’ डगौंराले भनिन्, ‘अब दोस्रो लटको उत्पादन बेच्न सुरु गरेकी छु ।’  उनी सबेरै च्याउको टोरी टाउकोमा राखेर ६ किलोमिटर टाढा महेन्द्रनगर बजार पुग्छिन् । दिउँसोसम्म महेन्द्रनगरमा च्याउ बिक्री गरेर घर फर्किन्छिन्।

डगौंराले कात्तिक पहिलो साता च्याउ राखेकी हुन् । उनले मंसिरदेखि उत्पादन सुरु भर बिक्री गर्न थालेकी हुन् । दैनिक चार/पाँच हजारको बिक्री भएको उनले बताइन् । एक लटमा ८० हजारसम्म बचत भएको उनले बताइन्। अहिले दोस्रो लटको उत्पादन भइरहेको छ । यसबाट पनि पहिलो लटकै हाराहारी आम्दानी हुने उनको अपेक्षा छ।