आफूले झापाको क्षेत्र नम्बर–५ बाट प्रत्यक्ष चुनाव लड्ने मनसाय भए पनि त्यसबाट पछि हटेको उनले बताइन् । ‘केपी ओलीको क्षेत्रबाटै प्रत्यक्ष चुनाव लड्ने योजना बनाएकी थिएँ,’ ज्वालाले भनिन्, ‘एक मतले भए पनि हार–जितमा फरक पर्छ भन्ने सुझाव पार्टीका नेता र परिवारबाट आयो ।’ अन्ततः उनले पिछडिएको क्षेत्र रोजेको बताइन् ।

उनले हालै अछाम जिल्लाबाट नागरिकताको प्रतिलिपि लिनुलाई उनको अधिकारले पाउने हकका रूपमा मात्र हेरिएको छैन । सामान्य प्रशासनिक प्रक्रियाजस्तो देखिने उनको यो कदमलाई अछामको राजनीतिक वृत्तमा फरक ढंगले हेरिएको छ । किनकि ज्वालाका श्रीमान्‌को पारिवारिक पृष्ठभूमि लामो समयदेखि अछामको एमाले राजनीतिसँग गाँसिएको छ ।

ज्वालाका कान्छा ससुरा शिवप्रसाद उपाध्याय नेकपा (एमाले) अछाम जिल्ला अध्यक्ष हुन् । त्यस्तै, उनका जेठा ससुराकी बुहारी अर्थात् ज्वालाकी जेठानी सरिता उपाध्याय एमालेबाट मंगलसेन नगरपालिकाको पूर्व उपप्रमुख भइसकेकी छन् ।

‘एकै परिवारमा ससुरा एमालेका जिल्ला अध्यक्ष, बुहारी रास्वपाकी केन्द्रीय सदस्य भएको विषयमा सबैको चासो देखिन्छ । उहाँहरूसँग मेरो सम्बन्ध राम्रो छ । उहाँहरुकै आशीर्वाद लिएर हिँडेको छु । तर अब भने हामी आ–आफ्नो कोर्समा अघि बढिसकेका छौँ,’ उनले भनिन्, ‘म राजनीतिक चेत भएको मान्छे हुँ । राजनीति विरासत भएको परिवारमा आएको छु । यसले मलाई धेरै सहज बनाएको छ । परिवारको साथले नै यो सबै सम्भव भएको हो ।’