डडेल्धुरा — अपांगता भएका तीन सन्तानसहित सात जनाको परिवार सामान्य सिलाइ व्यवसायबाट पालिरहेका अमरगढी नगरपालिका–३ गुजरलेकका लालबहादुर नेपालीलाई आर्थिक सहयोग जुटेको छ ।

कार्तिक १६ गते ‘दुःख र कष्टले जस्तै बुढ्यौलीमा सियो र धागोले पनि साथ छोडेको छैन’ भन्ने खबर ईकान्तिपुरको 'घरखर्च' स्तम्भमा प्रकाशित भएको थियो । 

उक्त खबर पढेर बुटवल घर भई रोजगारीका सिलसिलामा अहिले ग्रीसमा रहेका अभिषेक नेपालीले पाँच हजार रुपैयाँ आर्थिक सहयोग गरेका हुन् । समाचार पढेर थोरै भए पनि आर्थिक सहयोग गर्न मन लागेको उनले बताए । सात जनाको परिवारलाई अशक्त अवस्थामा पनि दुःख झेलेर पालिरहेको सुन्दा दुःख लागेर केही दिनका लागि भए पनि रासन खर्च पुगोस् भनेर सहयोग गरेको उनले बताए ।