डडेल्धुरा — डडेल्धुराको अमरगढी नगरपालिका–१ डोलाको फाँट अहिले सयपत्री फूलले ढकमक्क छ । यही खेतमा व्यावसायिक रूपमा पुष्प खेती गर्दै आएका सुरत ऐर दसैंतिहार नजिकिँदै गर्दा खेतमै व्यस्त रहन्छन् ।

विदेशको सट्टा गाउँमै केही गर्नुपर्छ भन्ने सोचले पाँच वर्षअघि उनले फूल खेती सुरु गरेका हुन् । कृषि विषयमा स्नातकोत्तर अध्ययन गर्दै आएका सुरत भन्छन्, ‘प्लास्टिकका आयातित माला किन्नेभन्दा आफ्नै गाउँमा फुलेका फूलको माला प्रयोग गर्नुमा गर्व मान्नुपर्छ ।’ उनको करिब डेढ रोपनी जमिन अहिले सयपत्री फूलले भरिएको छ । यो व्यवसायबाट उनले राम्रो आम्दानी गरिरहेका छन् ।

पछिल्ला वर्षमा यहाँका अन्य युवा पनि पुष्प खेतीतर्फ आकर्षित भएका छन् । उनीहरूका अनुसार फूल खेतीले रोजगारीका साथै स्थानीय उत्पादन प्रवर्द्धन गर्ने अवसर दिएको छ । परशुराम नगरपालिका–४ कटालका चक्रसिंह माल पनि त्यस्तै युवामध्ये एक हुन् । उनले तीन वर्षअघि तीन रोपनी खेतमा सयपत्री खेती सुरु गरेका थिए । अहिले उनी ‘कर्मा ५५५’ जातको सयपत्री फूल उत्पादन गर्दै आएका छन् । दसैं, तिहार र छठ पर्वमा उनले उत्पादन गरेका फूल डडेल्धुरा बजारदेखि धनगढीसम्म बिक्री हुन्छन् । ‘फूलको माग बढ्दै गएको छ, तर बजार व्यवस्थापनमा सहयोग गर्ने कोही छैन,’ मालले भने, ‘स्थानीय सरकारले प्लास्टिकका मालामा प्रतिबन्ध लगायो भने हामी जस्ता किसान अझ उत्साहित हुन्थ्यौं ।’ उनले विदेशी मालाको प्रतिस्पर्धा रोक्न प्रशासनले नै भूमिका खेल्नुपर्ने बताए ।