कैलाली — कैलाली उद्योग वाणिज्य संघको अध्यक्षमा पुष्कर ओझा निर्वाचित भएका छन् । नयाँ नेतृत्वका लागि भएको निर्वाचनमा कुल २३५५ मतदातामध्ये १९४० मत खसेको थियो ।

तीमध्ये ओझाले ९५० मत प्राप्त गर्दै विजयी बने । उनले निकटतम् प्रतिस्पर्धी रुपेश स्वाँरलाई ६१ मतले पराजित गरेका हुन् । स्वाँरले ८८९ मत पाएका थिए ।

ओझा र स्वाँर दुवैजना छुट्टाछुट्टै प्यानलसहित चुनावी मैदानमा उत्रिएका थिए । निवर्तमान कार्यसमितिमा वरिष्ठ उपाध्यक्ष रहेका ओझाको नेतृत्वमा गएको प्यानलका अधिकांश उम्मेदवार विजयी भएका निर्वाचन समितिले जनाएको छ । 

वरिष्ठ उपाध्यक्षमा भने स्वाँर प्यानलका उम्मेदवार केशवराज जोशी विजयी भए । उनले ९५७ मत प्राप्त गरे भने ओझा प्यानलका उम्मेदवार ओमबहादुर विष्टले ५५५ मत पाए । अर्का उम्मेदवार सुरेन्द्र राठीले २७२ मत प्राप्त गरे ।

उद्योग तर्फको उपाध्यक्षमा ओझा प्यानलका लक्ष्मणराज पन्त ९७६ मतसहित विजयी भए । उनका निकटतम् प्रतिद्वन्द्वी बासुदेव भट्टले ७३५ मत पाए ।

एसोसियट उपाध्यक्षमा ओझा प्यानलका मनोज अग्रवाल ६०२ मत प्राप्त गर्दै विजयी भए । उनका प्रतिस्पर्धी कविन्द्र पन्तले ५७२ मत र अनिल कुमार भोजानियाले ५१५ मत ल्याए । 

वाणिज्य तर्फको उपाध्यक्षमा ओझा प्यानलकै गगनराज केसी १००१ मत ल्याएर निर्वाचित भए । उनकी निकटतम् प्रतिद्वन्द्वी राधिकाकुमारी चौधरीले ७०९ मत पाइन् ।

वस्तुगत तर्फको उपाध्यक्षमा पनि ओझा प्यानलका भीमराज ओझा 'अबुल' ९०८ मत ल्याएर विजयी भए । उनका प्रतिस्पर्धी सिद्धराज पनेरुले ८२८ मत प्राप्त गरे ।

उपाध्यक्ष पदमा निर्वाचित पाँच जनामध्ये जोशी र पन्त स्वाँर प्यानलका हुन् भने अग्रवाल, केसी र ओझा 'अबुल' ओझा प्यानलका उम्मेदवार हुन् ।