दार्चुला — मालिकार्जुन गाउँपालिका-३ तेर्छालेकमा पहिरो खसेर अवरुद्ध भएको महाकाली लोकमार्ग सुचारू भएको छ ।

लेदोसहितको पहिरोले शुक्रबार साँझदेखि अवरूद्व सडकको पहिरो पन्छाएपछि बिहान साढे ११ बजेदेखि सवारी साधन आउजाउ गर्न थालेको प्रहरीले जनाएको छ । 

प्रहरीका अनुसार सडक सुचारू भएपछि रोकिएका सवारी साधन गन्तव्यतिर प्रस्थान गरेका छन् । लामो समय सडक अवरुद्ध हुँदा यात्रुलाई सास्ती भएको थियो । 

जिल्ला बाहिरबाट आउने र जिल्लाबाट बाहिरिने लामो दूरीका यातायातका साधन हिजो रातिदेखि नै रोकिएका थिए । अहिले भने सडक सञ्चालन भएसँगै लामो दूरीका सवारीसाधन गन्तव्यतिर लागेको जिल्ला प्रहरी कार्यालय दार्चुलाका प्रहरी निरीक्षक तथा सूचना अधिकारी छत्रबहादुर रावतले बताए ।

सोही ठाउँमा यही साताभित्रै ३ पटक सडक अबरुद्ध भएको छ । थोरै वर्षा हुँदा पनि लेदोसहितको पहिरो खस्ने हुँदा पटक–पटक सडक अबरुद्ध हुने गरेको छ ।