धनगढी — सुदूरपश्चिम प्रदेश सरकारकाले आगामी आर्थिक वर्षका लागि प्रस्तुत गरेको बजेटमा शैक्षिक क्षेत्रको विकासका लागि एक निर्वाचन क्षेत्र एक नमुना विद्यालय, कृषि क्षेत्रको विकासका लागि एक स्थानीय तह दुई उत्पादन, महिला, बालबालिका र ज्येष्ठ नागरिक दशकलगायत केही रचनात्मक कार्यक्रम पनि समावेश छन् ।

विगत वर्षदेखि प्रदेश सरकारले एमबीबीएस छात्रवृत्ति कार्यक्रमलाई आगामी आर्थिक वर्षमा पनि निरन्तरता दिइएको छ ।

सुदूरपश्चिममा पनि पछिल्ला शैक्षिक सत्रमा स्थानीय सामुदायिक विद्यालयमा विद्यार्थी संख्या घट्दै गएकाले विद्यालय मर्ज हुने क्रम बढिरहेको छ । त्यसैले आगामी वर्षको बजेटमा प्रदेश सरकारले ‘एक प्रदेश निर्वाचन क्षेत्र एक नमुना विद्यालय’ योजना अघि बढाएको हो । क्रमागत रुपमा सञ्चालन हुने उक्त कार्यक्रम अन्तर्गत सरकारले आगामी वर्षको बजेटमा एउटा विद्यालयका लागि ७५ लाखका दरले २४ करोड विनियोजन गरिएको छ ।

सामाजिक विकास मन्त्रालयअन्तर्गत सञ्चालन हुने कार्यक्रममा विनियोजित रकममध्ये २० लाख रुपैयाँ उपकरण, शिक्षकहरुको दक्षता अभिवृद्धिलगातय कार्य गर्न खर्च हुने र ५० लाख रुपैयाँ भौतिक पूर्वाधार विकासमा खर्च हुने जनाइएको छ । चालु आर्थिक वर्षमा नमुना विद्यालय छनोट गरी गुरुयोजना तयार गर्न लागिएको सामाजिक विकास मन्त्री मेघराज खड्काले बताए ।