‘शुक्लाको सिकारी ताल चराका लागि निकै आकर्षक देखिएको छ,’ निकुञ्जका संरक्षण अधिकृत पुरुषोतम वाग्लेले भने, ‘संरक्षित क्षेत्र र बाहिर भेटिएकामध्ये ८० प्रतिशत बढी चरा सिकारी तालमा भेटिएका छन् ।’ उनका अनुसार सिकारी ताललाई पछिल्लो समय पन्छी तालका रुपमा पनि चिन्न थालिएको छ ।

पन्छी संरक्षण संघले निकुञ्ज कार्यालय, राष्ट्रिय प्रकृति संरक्षण कोष, पन्छी संरक्षण समूह कञ्चनपुर र नेपाल पन्छीविद् संघको सहकार्यमा जलपन्छीको गणना गरेको हो । गणनामा ३३ जना प्राविधिक खटिएका थिए । प्राकृतिक तालहरुमा मिचाहा प्रजातिको वनस्पतिले चराको बासस्थान खल्बलिनुका साथै आहाराको अभावका कारण हालका वर्षमा जलपन्छीको संख्या कम हुँदै गएको प्राविधिक डगौंरा बताउँछन् । उनका अनुसार तालहरुको संरचना मिचाहा प्रजाति र भूक्षयका कारण निरन्तर परिवर्तन भइरहेको छ । यसका कारण चरालाई असहज हुने भएर संख्या कम हुन थालेको हो ।

सिकारी ताललाई रामसार सूचिमा समावेश गर्न अध्ययन सुरु गरिएको छ । निकुञ्ज तथा वन्यजन्तु संरक्षण विभागले इकोलोजिस्ट हरिभद्र आचार्यको संयोजकत्वमा अध्ययन टोली गठन गरेको छ । टोलीले गत साता सिकारी तालको अवलोकन गरेको निकुञ्जका संरक्षण अधिकृत वाग्लेले बताए । विभागले नै ताललाई रामसार क्षेत्रमा सूचिकृत गर्न अग्रसरता देखाएको उनले बताए ।