धनगढी — धनगढी उपमहानगरपालिका–१० त्रिनगर भन्सारको सीमानाकामा दुई युवाबाट ३ दशमलव ७० ग्राम खैरो हेरोइन बरामद गर्‍यो । त्रिनगर प्रहरी युनिटका प्रहरीले भारतबाट नेपालतर्फ आउँदै गरेका २३ र २९ वर्षीय दुई युवामाथि शंका लागेर जाँच गर्दा लागूऔषध बरामद गरेको हो । यसअघि मंगलबार धनगढी– १० खप्तड इँटाभट्टा नजिक एक दम्पतीबाट प्रहरीले ८ सय ५० मिलिग्राम खैरो हेरोइन बरामद गरेको थियो ।

प्रहरीले खुला सीमा क्षेत्रबाट थोरै मात्रामा खैरो हेरोइन बोकेर ल्याउने युवायुवतीलाई दिनदिनै पक्राउ गर्ने गरेको छ । जिल्ला प्रहरी कार्यालय प्रमुख दीपेन्द्रबहादुर पालले प्रहरीको नियमित गस्ती गर्दै साधारण जाँचको क्रममा लागूऔषध बरामदका घटना बढिरहेको बताए । ‘दिनदिनै सीमा क्षेत्रमा प्रहरीले लागू पदार्थ बरामद गर्ने गरेको छ,’ उनले भने, ‘यसबाट हाम्रो समाजमा लागूऔषध दुर्व्यसनीको अवस्था भयावह स्थितिमा पुग्दै छ, भन्ने बुझाउँछ ।’

प्रहरी उपरीक्षक पालले भारतका सीमावर्ती बजारमा सहजै पाउने खैरो हेरोइनलगायतका लागूऔषध कुलतमा फसेका युवायुवतीले ल्याउने र उनीहरूबाट अन्य युवायुवतीलाई किनबेच हुने गरेको पाइएको बताए । ‘भारतबाट खैरो हेरोइन लागू पदार्थ र पहाडबाट चरेस आउने गरेको छ,’ उनले भने, ‘पछिल्लो समयमा कैलाली र कञ्चनपुरमा लागूऔषधको कारोबार र सेवनकर्ता बढ्दै छन् ।’ प्रहरी उपरीक्षक पालका अनुसार यहाँबाट लागूऔषध चरेस भारत जाने गरेको छ । मंसिरयताका तीन महिनामा कैलाली प्रहरीले २७ किलो ४९ ग्राम ६ सय ८० मिलिग्राम चरेस बरामद गरेको छ । उनले भारतबाट आउने नाइट्राभेट १ सय २८ स्पास ८८ बरामद भएकोसहित ९९ जनालाई कारबाही गरी मुद्दा चलाएको बताए । कैलालीको धनगढी, गोदावरी, भजनी, लम्की चुहा, टीकापुर, घोडाघोडी र गौरीगंगा नगरपालिकाका विभिन्न स्थानमा लागूऔषध प्रयोग र बिक्रीवितरणकर्ताको अखडा रहने गरेको छ ।