१६.१२°C काठमाडौं
सुदूरपश्चिममा गौरा पर्व सुरु
बैतडी — बिहीबारबाट सुदूरपश्चिममा गौरा पर्व सुरु भएको छ । सुदूरपश्चिममा मुख्य पर्वका रुपमा लिइने गौरा पौराणिक कालमा भगवान् महेश्वरको प्राप्तिका लागि गौरा देवी अर्थात पार्वतीले निराहार नित्य आराधना गरी भगवान् शिवलाई पतिको रुपमा प्राप्ति भएको विश्वास गरिन्छ ।
पहिलो दिन बिरुडा पञ्चमीमा घर–घरमा महिलाले तामाका भाडामा पाँच प्रकारका अन्न (बिरुडा) भिजाएर पर्वको सुरुवात गरिएको छ ।
ब्रतालु महिलाहरुले शिव पार्वतीको गाथामा आधारित फागहरु गाएर सामूहिक रुपमा बिरुडा भिजाउने गर्छन् । बिरुडा भिजाएसँगै गौरापर्वको सुरुवात भएको दशरथचन्द नगरपालिका–४ कि लीला भण्डारीले बताइन् । गहुँ, केराउ, गहत, मास र गुराउसलाई तामा वा पित्तलका भाडामा बिरुडा भिजाउने चलन रहिआएको उनले बताइन् ।
पञ्चमीका दिन भिजाएका बिरुडालाई षष्ठीका दिन नजिकका धारा वा तलाउमा लगेर धुने चलन छ । सप्तमीका दिनमा गौरालाई भित्र्याउने चलन छ । गौराको मुख्य दिन दुर्वाष्टमी अर्थात अठ्यावालीका दिन गौराखलामा लगेर पूजा गर्ने चलन रही आएको छ । स्थानीयहरु आ–आफ्नो टोलको मुख्य एक स्थानमा जम्मा भएर पूजाआजा र देउडा खेल्दै गौराको समापन गर्ने गर्छन् ।
प्रकाशित : भाद्र १६, २०७९ ११:५७
