टीकापुरमा बालकको हत्या- सुदूरपश्चिम - कान्तिपुर समाचार
कान्तिपुर वेबसाईट
AdvertisementAdvertisement

टीकापुरमा बालकको हत्या

गणेश चौधरी

टीकापुर — टीकापुर नगरपालिका–१ ब्लक नं ८ का साढे ३ वर्षीय बालक विवेक विष्टको हत्या भएको छ । उनकै दिदी नाता पर्नेले जमरा कुलोको डिलमा लगेर कुलोमा धकेली हत्या गरेको प्रहरीले जनाएको छ ।

बालकको हत्याको विषयमा जानकारी दिँदै कैलालीका प्रहरी उपरीक्षक विश्व अधिकारी ।

जामुन खाने निहुँमा बालकलाई घरबाट आफूसँगै लगी हत्या गरेको कैलालीका प्रहरी उपरीक्षक विश्व अधिकारीले बताए । उनले भने, ‘घरबाट करिब ५ सय मिटर उत्तरतर्फ जमरा कुलोको डिलमा लगेर बालकको खुट्टामा रहेको बाला निकालेर धक्का दिइ कुलोमा खसालेर उनले हत्या गरेको स्वीकारेकी छिन् ।’

जमरा कुलो नजिक घटना भएको र अनुसन्धानबाट बालकको अपहरण भएको शंका नभएपछि बालक जमरा कुलोमा हुन सक्ने अनुमान गरिएको थियो । कुलोको पानी घटाउन लगाएर खोजी गर्दा घटनास्थलबाट करिब ५ किलोमिटर तलतिर टीकापुर नगरपालिका–४ बाघमारास्थित जमरा कुलोमा बालकको शव भेटिएको उनले बताए ।

मृतक विवेक विष्ट सोमबारबाट बेपत्ता भएका थिए । उनको शव बुधबार फेला परेको थियो ।

थप अनुसन्धानका लागि मृतक बालककी दिदी नाता पर्ने अन्दाजी १५ वर्षीया बालिका र उनकी साथी अन्दाजी १४ वर्षीया लम्कीचुहा नगरपालिका घर भइ टीकापुर नगरपालिका–१ ब्लक नं ५ डेरा गरी बस्नेलाई नियन्त्रणमा लिएको प्रहरीले जनाएको छ ।

प्रहरी उपरीक्षक अधिकारीले भने, ‘बालिकाले किन हत्या गरिन् भन्ने विषयमा अनुसन्धान गरिरहेका छौं ।’

प्रकाशित : असार २४, २०७८ १६:३१
प्रतिक्रिया
पठाउनुहोस्

कर्णाली प्रदेश सभा बैठक फेरि अवरुद्ध

चाँदनी कठायत

वीरेन्द्रनगर — कर्णाली प्रदेश सभा बैठक प्रमुख प्रतिपक्षी दल नेकपा (एमाले)ले बिहीबार पनि अवरुद्ध पारेको छ । 

आइतबार कर्णाली प्रदेशसभा अवरुद्ध गर्दै एमाले सांसदहरु ।

एमालेले राख्दै आएको प्रश्नप्रति सरकार जिम्मेवार नभएको भन्दै बैठकमा अवरोध पुर्‍याइएको हो । बैठकको सुरुमा नै बोल्दै पूर्व न्त्री एवम् एमालेका सांसद दल रावलले सरकार बजेटप्रति उत्तरदायी नभएको प्रमाण देखाइरहेको बताए । उनले लोकतन्त्रमा प्रश्न गर्न पाइने भएकाले नै एमालेले प्रदेश सभामा नैतिक ढंगले राजनीतिक तथा संवैधानिक प्रश्न राखेकोमा सरकारले यसतर्फ वास्ता नगरेको बताए ।

‘लोकतन्त्र भनेकै बहुमतले अल्पमतमाथि शासन गर्ने प्रक्रिया हो,’ उनले भने, ‘यहाँ त लाजमर्दो अवस्था छ, ४० सिटमध्ये २० सिटमा एमाले छ, १८ सिट भएका दुईवटा दलहरुले सरकार सञ्चालन गरिरहेका छन्, नैतिक, राजनीतिक लोकतान्त्रिक र वैधानिक रुपमा यो कत्तिको सत्य हो ?’

सांसद रावलले सरकारमा लोकतन्त्रलाई नै मार्गदर्शन बनाएको कांग्रेस पार्टी सरकारमा रहेको भन्दै सरकार चलाउन भन्दै लोकतन्त्र बलियो बनाउतर्फ लाग्न आग्रह गरे । लोकतन्त्र मासिने चिन्ता देखाएका पार्टीले नै प्रदेशको लोकतन्त्र मासिँदै गएकोप्रति ध्यान नदिएको उनको भनाइ छ । अल्पमतमाथि बहुमतले शासन गर्ने व्यवस्था कहाँ छ ? भन्दै उनले प्रश्न गरे ।

सरकारले जवाफ नदिएसम्म आफूहरुले बैठकको कारबाही अगाडि बढाउन नदिने अडान राख्ने सांसद रावलले बताएपछि एमालेका सांसदहरुले उठेर विरोध जनाए । एमालेले बैठकमा अवरोध गरेपछि सभामुख राजबहादुर शाहीले बस्न आग्रह गरे । तर एमालेका सांसदहरुले आफ्नो अडान नछाडेपछि सभामुख शाहीले आगामी आइतबार दिउँसो २ बजेसम्मका लागि बेठक स्थगित भएको जानकारी गराए ।

असार १ गते प्रदेश सभाको १० औं बैठकबाट आगामी आर्थिक वर्षको बजेट सार्वजनिक गरेको कर्णाली प्रदेश सरकारले बजेटमाथि छलफल चलाउन सकेको छैन । एमालेभित्रको राजनीतिक विवादका कारण बजेट सार्वजनिक भएको २४ दिनसम्म पनि प्रदेश सभामा बजेटमाथि छलफल हुन नसकेको हो । चालु आव सकिन एक सातामात्रै बाँकी छ ।

प्रकाशित : असार २४, २०७८ १६:३०
पूरा पढ्नुहोस्
प्रतिक्रिया
पठाउनुहोस्
×