कर्णालीमा बृहत् आँखा उपचार सेवा विस्तार गर्ने समझदारी

समझदारीपत्रमा कर्णाली प्रदेशका जनतालाई बृहत् आँखा उपचार सेवा उपलब्ध गराउन तिलगंगा आँखा प्रतिष्ठानले कर्णाली स्वास्थ्य प्रतिष्ठानलाई अत्याधुनिक स्वास्थ्य उपकरण उपलब्ध गराउने उल्लेख छ । तिलगंगा आँखा प्रतिष्ठानका संस्थापक एवं निर्देशक डा. सन्दुक रुइतले कर्णाली स्वास्थ्य प्रतिष्ठानअन्तर्गतलाई अत्याधुनिक स्वास्थ्य उपकरण उपलब्ध गराउने प्रतिबद्धता व्यक्त गरे ।

उनले प्रतिष्ठानअन्तर्गत नेत्र रोग उपचार विभागलाई सशक्त बनाउॅदै समग्र कर्णाली प्रदेशमा आँखा उपचार सेवालाई विस्तार गर्ने समझदारी भएको बताए । आँखा उपचारका लागि अत्यावश्यक सबै प्रकारका आधुनिक स्वास्थ्य उपकरण र संरचना निर्माणमा सहयोग उपलब्ध गराउनेछौं,’ डा रुइतले भने, ‘कर्णाली प्रदेशको कुना कुनामा गएर सेवा उपलब्ध गराउने र त्यसमा पनि मोतिविन्दु, जलविन्दु तथा मधुमेहजन्य आँखाको समस्याको उपचारलाई सहज र सुलभ रूपमा सबैको पहुाचमा पुर्‍याउन हामीबीच सहकार्य हुनेछ ।’

स्वास्थ्यमन्त्री बस्नेतले उक्त समझदारीले कर्णाली प्रदेशकै जनताको आँखा उपचार सेवामा सहज पहुच पुग्ने विश्वास व्यक्त गरे । उनले आँखा उपचारका लागि रणनीति बनाएरै सहकार्य र सहजीकरण गर्न तयार रहेको प्रतिबद्धता गरे ।

दुई प्रतिष्ठानबीचको सहकार्यले कर्णाली प्रदेशका गरिब, विपन्न, निमुखा र अप्ठ्यारामा परेका नागरिकले आँखाको सहज उपचार पाउनेमा हामी विश्वस्त छौ,स्वास्थ्यमन्त्री बस्नेतले भने,‘ मन्त्रालयले गर्न सक्ने सबै सहयोग र सहजीकरण गर्न तयार छ ।’

कर्णाली स्वास्थ्य विज्ञान प्रतिष्ठानका उपकुलपति डा. मंगल रावलले तिलगंगा आँखा प्रतिष्ठानसॅगको सम्झौताले आफूहरू उत्साहित भएको बताए । सम्झौताअनुसार प्राप्त हुने आधुनिक स्वास्थ्य उपकरण उपलब्ध भए लगतै केही महिनामै सबै प्रकारका आँखासम्बन्धी उपचार सेवा सुरु गर्न प्रतिबद्ध रहेको प्रतिक्रिया दिए ।

‘आँखासम्बन्धी उपचारका लागि अत्यावश्यक आधुनिक उपकरण खरिदका लागि पर्याप्त बजेट नहुनु र अन्य संघ संस्थासंग सहकार्य गर्ने अवसर नमल्निु नै ठुलो चुनौती थियो,’ उपकुलपति डा. रावलले भने, ‘तिलगंगासँगको सम्झौताले आँखा उपचारसँगै अध्ययन र अध्यापनका लागि अवसर सिर्जना गर्दै लग्ने अपेक्षा छ । ’

कर्णाली स्वास्थ्य विज्ञान प्रतिष्ठानमा तीन वर्षदेखि आँखासम्बन्धी रोगको उपचार सेवा सञ्चालन भइरहेको छ । यद्यपि बजेट र विशेषज्ञ चिकित्सकको अभावमा सेवालाई विस्तार गर्न सकेको छैन ।