केदारनाथ पहिरो : ज्यान गुमाएका युवाको परिवार शोकमा
![](https://assets-cdn.ekantipur.com/uploads/source/ads/900-100-0252024112350.gif)
![](https://assets-cdn.ekantipur.com/uploads/source/ads/ekantipur900x100-3082024084948.gif)
कालीकोट — भारतको केदारनाथमा बिहीबार राति गएको पहिरोमा परी ज्यान गुमाएका कालीकोटको खाडाचक्रका ३ युवकको परिवार शोकाकुल बनेको छ । गत वैशाखमा नयाँ वर्ष मनाएर केदारनाथ गएका खाडाचक्र १ र २ मान्म गाउँका ३ युवकको पहिरोमा ज्यान गएको हो ।
![](https://assets-cdn.ekantipur.com/uploads/source/ads/ekantipur-1-1282024082932.gif)
![केदारनाथ पहिरो : ज्यान गुमाएका युवाको परिवार शोकमा](https://assets-cdn-api.ekantipur.com/thumb.php?src=https://assets-cdn.ekantipur.com/uploads/source/news/kantipur/2023/miscellaneous/kalikot-kedarnatha-news-photo-2-0582023094146-1000x0.jpg&w=1001&h=0)
![](https://assets-cdn.ekantipur.com/uploads/source/ads/comp-900x100-1672024010950.gif)
केदारनाथ पैदलमार्गको पहिलो विन्दु गौरीकुण्डको एक होटलमा सुतिरहेको अवस्थामा १८ गते राति गएको पहिरोमा परी कालीकोटको खाडाचक्र १ मान्म कोइरेल गाउँका ३९ वर्षीय प्रकाश ताम्राकार, खाडाचक्र २ मान्म धैनेडीका ३२ वर्षीय टेक विश्वकर्मा र ३८ वर्षीय देवी विश्वकर्माको मृत्यु भएको खाडाचक्र १ का वडाध्यक्ष धर्मराज ताम्राकारले बताए । 'ज्याला मजदुरी गरेर परिवार पाल्ने ३ जना युवकको मृत्यु भएको खबर आएपछि परिवार शोकमा छ,' उनले भने, 'परिवारमा रुवाबासी छ । भारत गएर लास बुझ्न सक्ने पनि घरमा कोही छैनन् ।'
कालीकोटका तीनै जना युवाहरू केदारनाथमा काम गर्नका लागि जिल्ला प्रशासनबाट सिफारिस लिएर गत वैशाख ३ गते घरबाट गएका थिए ।
भारतको कमाइले परिवार पाल्दै आएका टेक विश्वकर्माको परिवारमा ६ वर्षकी छोरी मनिषा र ४ वर्षका छोरा आयुष भएको पत्नी भद्दा विकले कान्तिपुरलाई बताइन् । 'कमाइ भएपछि दसैंसम्म फर्किन्छु भनेका थिए,' उनले ३ दिनअघि पतिसँग मोबाइलमा कुरा गरेको सुनाउँदै भनिन्, 'दुःखद खबर आयो । मेरो त संसारै अँध्यारो भयो ।'
खेतबारीको कमाइले ३ महिना पनि खान नपुग्ने उनको परिवार भारतको ज्यालामजदुरीले धानेको थियो । उनको घरमा ७८ वर्षका वृद्ध बुबा धन्सुरे र आमा थुर्पी छन् । तर हिँडडुल गर्न सक्दैनन् । दुवै दमका बिमारीले थला परेका छन् ।
एक वर्षसम्म भारतको टिहीमा ज्याला मजदुरी गर्दा कमाइ राम्रो नभएपछि केदारनाथमा कण्डी (मान्छे बोक्ने काम) को काम खोज्दै केदारनाथ पुगेको देवी विकको परिवारको पनि बिचल्ली छ । भारतको कमाइ पतिले पठाइदिएर दुई नाबालक छोराको लालनपालन गर्दै आएकी उनकी ३० वर्षीया पत्नी झुमा विक मृत्युको खबर सुनेपछि होसमा नभएको स्थानीय भवानी आवासीय विद्यालय मेग्रका प्रधानाध्यापक नर विश्वकर्माले बताए ।
त्यस्तै, कोइरेल गाउँका प्रकाश पनि वैशाखमै घरबाट केदारनाथ गएका थिए । पहिरो गएको दिन देवी केदारनाथको चुचुरोबाट भारी बोकेर तल गौरीकुण्ड झरेको स्थानीय नन्दे कामीले बताएका छन् । उनी पहिरो गएको ठाउँभन्दा ३ सय मिटर पर बास बसेका थिए । केदारनाथ पहिरोमा ज्यान गुमाएकामध्ये हालसम्म ९ जनाको शव भेटिएको र अन्यको खोजी भइरहेको नन्देले सामाजिक सञ्जालमार्फत जानकारी दिएका छन् । भारतीय सञ्चारमाध्यमहरुले केदारनाथ पहिरोमा हालसम्म तीन जना नेपालीसहित एक भारतीयको शव भेटिएको जनाएका छन् । बेपत्ताहरूको खोजी भइरहेको बताइएको छ ।
![](https://assets-cdn.ekantipur.com/uploads/source/ads/900-x-100-1-0282024055738.gif)