गुल्मी — गुल्मीको चन्द्रकाेटमा आधारभूत अस्पताल सञ्चालन भएको छ । गाउँपालिकाको मुकाम शान्तिपुरमा निर्माण सम्पन्न 'एक पालिका : एक आधारभूत अस्पताल' अन्तर्गतको चन्द्रकाेट आधारभूत अस्पताल सञ्चालनमा आएको हो ।

१५ शय्याको आधारभूत अस्पतालका लागि भौतिक संरचना पूरा भएपछि पालिकाले मापदण्डअनुसार जनशक्ति व्यवस्थापन गर्न नसक्ने भए पनि दुई मेडिकल अधिकृतसहित स्थानीय दुई स्वास्थ्य चौकी समायोजन गरेर आधारभूत अस्पताल सञ्चालन गरेको हो ।

अस्पतालबाट ल्याब सेवा, बर्थिङ सेन्टर, भिडियो एक्सरे, एम्बुलेन्स सेवा र सामान्य जाँचका सेवा सञ्चालन हुने पालिकाका स्वास्थ्य शाखा प्रमुख सन्तोष पुनले जानकारी दिए । लुम्बिनी प्रदेश सरकारबाट एक मेडिकल अधिकृत र पालिकाबाट एक मेडिकल अधिकृत साथै स्थानीय स्वास्थ्य चौकीबाट अन्य जनशक्ति व्यवस्थापन गरेर अस्पताल सञ्चालनमा आएको उनेले बताए ।

यद्यपि स्वास्थ्य चौकीबाट पनि सेवा प्रदान भइरहेका छन् । चन्द्रकाेटमा  तुलसीभक्त अर्जुन विल्डर्स जेभीमार्फत भ्याटसहित १३ करोड ६६ लाख रुपैयाँमा २०७८ असार १० मा सम्झौता भई एक वर्ष म्याद थप गरी गत असारमा सम्पन्न भएको थियो ।

आधारभूत अस्पतालमा मापदण्ड अनुसार तीन जना एमबीबीएससहित २८ स्वास्थ्यकर्मी र ४ जना कार्यालय सहयोगीसहित ३२ जनाको दरबन्दी हो । यस दरबन्दी अनुसार हालकै अवस्थामा पालिकाले सञ्चालन गर्न सक्ने अवस्था भने छैन ।