बर्दिया — चितुवाको आक्रमणबाट एक जना बालिकाको मृत्यु भएको छ । गुलरिया नगरपालिका–५ बालापुरकी ५ वर्षीया सायरा थारुको चितुवाको आक्रमणबाट बुधबार बिहान पौने ९ बजे मृत्यु भएको हो ।
घर नजिकै रहेको शौचालयबाट फर्किने बेलामा चितुवाले आक्रमण गर्दा बालिकाको मृत्यु भएको जिल्ला प्रहरी कार्यालय गुलरियाका डिएसपी चक्रबहादुर डमलपालले बताए । मृत बालिकाको शव बर्दिया अस्पतालमा राखिएको छ ।
गत वैशाख १५ गते गुलरिया नगरपालिका–८ डम्पङि साइड सर्जु सामुदायिक वनमा चितुवाको आक्रमणबाट ९ वर्षीय मेलिना खड्काको मृत्यु भएको थियो भने गत चैतमा चितुवाको आक्रमणबाट गुलरिया नगरपालिका–४ का ६५ वर्षीय बिक्कुलाल थारु र गुलरिया नगरपालिका–५ बालापुरका ७ वर्षीय सिर्जन थारुलाई चितुवाले आक्रमण गरी घाइते बनाएको थियो ।
लामो समयदेखि उक्त स्थानमा चितुवाले आतंक मच्चाउँदा पनि सम्बन्धित निकायले नियन्त्रणमा लिन सकेको छैन । लामो समयदेखि चितुवा नियन्त्रणमा नआउँदा स्थानीय त्रसित बनेका छन् ।
घर नजिकै रहेको बालापुर सामुदायिक वनबाट आएको चितुवाले बालिकालाई आक्रमण गरेको डिभिजन वन कार्यालयका सूचना अधिकारी रामकुमार चौधरीले बताए । लामो समयदेखि सो लोकेसनमा केज राखेपनि चितुवा केजमा नपरेको चौधरीले जनाए ।
