बर्दियामा जेठ ११ गते सम्म लम्बियो निषेधाज्ञा- लुम्बिनी - कान्तिपुर समाचार
कान्तिपुर वेबसाईट
AdvertisementAdvertisement

बर्दियामा जेठ ११ गते सम्म लम्बियो निषेधाज्ञा

कमल पन्थी

बर्दिया — कोभिड १९ को संक्रमण नियन्त्रण, रोकथाम र उपचारका लागि स्थानीय प्रशासनले शनिबारदेखि थप ११ दिनका लागि निषेधाज्ञा जारी गरेको छ । जेठ १ देखि ११ गते सम्म निषेधाज्ञा थपिएको छ ।

गुलरिया

यसअघि पहिलोपटक बैशाख १३ गते १९ गतेसम्म निषधाज्ञा आदेश जारी गरेको थियो । दोस्रोपटक २० गते देखि ३१ गते राति १२ बजेसम्म जिल्लाभर निषेधाज्ञा लागू गरिएकोमा थप ११ दिन बढाइएको छ ।

खाद्यान्न,फलफूल र दैनिक उपभोग्यका पसल बिहान ६ देखि ९ बजेसम्म खुला रहने छ । यसअघि गरिएको निषेधाज्ञामा हुलाकी र पूर्व–पश्चिम राजमार्गमा कडाइ गरेपनि सहर र गाउँका गल्ली र सडकमा भीडभाड बढेको छ । सुरक्षाकर्मी ती सडक र गल्लीमा गस्ति नबढाएका कारण भीडभाड बढेको स्थानीयले गुनासो गरेका छन् ।

प्रमुख जिल्ला अधिकारी सन्तबहादुर सुनारले जेठ १ गतेबाट सवारी साधन र आउजाउमा जाँच कडा पार्ने बताए । 'स्वास्थ्य संक्रमण ऐन अनुसार अत्यावश्यक काम बाहेक र भारतबाट अवैद्यरुपमा प्रवेश गरे एक महिना जेल पठाउने छौं,’ उनले भने, ‘कोरोनाबाट बचाउन पहिलो दायित्व भएकोले निषेधाज्ञाको पालना नगर्ने माथि कडा कारबाही हुनेछ ।'

कोरोना संक्रमण बढ्दै गएपछि स्थानीय प्रशासनले तेस्रो पटक निषेधाज्ञा जारी गरेको हो । जिल्लामा कोरोना संक्रमितहरु खुलेआम घर बाहिर निस्केर टोल र बजारमा घुम्ने गरेकाको रेकर्ड राख्ने र कारबाही गर्ने स्थानीय प्रशासनले जनाएको छ ।

दोस्रो चरणको कोरोना महामारी फैलिएपछि बर्दियामा हालसम्म ४६ जनाको मृत्यु भइसकेको स्वास्थ्य कार्यालयका सूचना अधिकारी नरेश श्रेष्ठले बताए । सक्रिय संक्रमितको संख्या १ हजार २ सय ९६ रहेका छन् ।

प्रकाशित : वैशाख ३१, २०७८ १७:५१
प्रतिक्रिया
पठाउनुहोस्

बर्दियामा अक्सिजन सिलिण्डरको अभाव

कमल पन्थी

बर्दिया — जिल्लाको आठ पालिकासहित बर्दिया अस्पतालमा अक्सिजन सिलिण्डरको अभावमा उपचारमा समस्या भएको छ । कोभिडका बिरामीलाई प्राथमिक उपचार बाहेक अक्सिजनको अभावले समस्या हुन थालेको छ ।

जिल्ला अस्पतालमा ३१ वटा अक्सिजन भएपनि थप १ सय ४ वटा ठूला सिलिण्डरको अभाव भएको जनाएको छ । कोभिडका बिरामी थपिदै गएपछि सुत्केरी लगायत अन्य इमरजेन्सीका बिरामीका लागि अक्सिजन सिलिण्डर नभएको अस्पतालका मेसु डा. सुभाष पाण्डेयले बताए ।

बुधबार ५ वटा सिलिण्डर खरिद गरिएको उनले बताए । अक्सिजन सिलिण्डरको अभाव बढ्दै गएका कारण यहाँ आउने बिरामीका लागि थप समस्या आउन थालेको मेसु पाण्डेयले गुनासो पोखेका छन् । ठूलो सिलिण्डर बजारमा नपाएका कारण पालिकाले खरिद गर्न नपाएको जिल्ला समन्वय समितिका प्रमुख शंकर चौधरीले बताए ।

जिल्ला स्वास्थ्य कार्यालयका सूचना अधिकारी नरेश श्रेष्ठले आठवटा पालिकामा १ सय २६ वटा अक्सिजन सिलिण्डर मौज्दात रहेको उनले बताए । ३१ वटा जिल्ला अस्पताल र १६ वटा साना सिलिण्डर अक्सिजन बैंकमा रहेको उनले जनाए ।

गम्भिर खालका आएका बिरामीका लागि साना सिलिण्डरले अक्सिजन दिन नपुग्ने स्वास्थ्यकर्मी बताउँछन् । सामान्य खालका बिरामीलाई तत्काल प्राथमिक उपचारका लागि सानो सिलिण्डर प्रयोग हुन्छ । तर गम्भिर खालका बिरामीलाई अन्य ठाउँ रिफर गर्नु पर्ने बाध्यता रहेको स्वास्थ्यकर्मी बताउँछन् ।

'मेरो लागि अक्सिजनमा, मेरो योगदान' भन्ने उद्देश्यका साथ यहाँका युवा व्यवसायीले स्थापना गरेको अक्सिजन बैंकले १६ वटा साना अक्सिजन सिलिण्डर जोहो गरेको युवा व्यवसायी भेषराज पौडेलले बताए । अक्सिजन सकिएपछि सिलिण्डर भर्न नेपालगन्ज लैजानुपर्ने र त्यहाँ सिलिण्डर भर्नका लागि लाम लाग्नुपर्ने बाध्यता छ ।

प्रकाशित : वैशाख २९, २०७८ १६:४९
पूरा पढ्नुहोस्
प्रतिक्रिया
पठाउनुहोस्
×