बर्दियामा एक बाघ नियन्त्रणमा- लुम्बिनी - कान्तिपुर समाचार

बर्दियामा एक बाघ नियन्त्रणमा

कमल पन्थी

बर्दिया — बर्दिया राष्ट्रिय निकुञ्जको मध्यवर्ती क्षेत्रमा पर्ने गेरुवा–४ को गोला सामुदायिक वनबाट बुधबार एक बाघलाई नियन्त्रणमा लिइएको छ । राष्ट्रिय प्रकृति संरक्षण कोषको प्राविधिक टोली र बर्दिया निकुञ्जका कर्मचारीको सहयोगमा बाघ नियन्त्रणमा लिइएको हो ।

राष्ट्रिय प्रकृति संरक्षण कोषका वन्यजन्तु विशेषज्ञ डा. नरेश सुवेदीले नियन्त्रणमा लिएको बाघ भाले भएको बताए । उक्त बाघ क्यामेरा ट्रयापिङमा पटकपटक कैद भएपछि प्राविधिक टोलीले नियन्त्रणमा लिएको हो । नियन्त्रणमा लिएको बाघ समस्याग्रस्त भएको डा. सुवेदीले बताए ।

नियन्त्रणमा लिइएको बाघलाई पशु एम्बुलेन्समा राखेर रम्मापुरमा लगिने भएको छ । निकुञ्जको मुख्यालय ठाकुरद्वारामा बाघ राख्ने दुईवटा खोर नभएकाले यसलाई रम्मापुरमा पठाइने प्रमुख संरक्षण अधिकृत विष्णु श्रेष्ठले जनाए । यसअघि कात्तिक १५ गते बर्दिया राष्ट्रिय निकुञ्जको मध्यवर्ती क्षेत्रबाट एक बाघलाई डार्ट अर्थात् लठ्याएर नियन्त्रणमा लिइएको थियो । उक्त बाघ अहिले पनि निकुञ्जको मुख्यालयको खोरमा छ ।

प्रकाशित : चैत्र ४, २०७७ १९:५९
प्रतिक्रिया
पठाउनुहोस्

प्रेसिडेन्ट लिग : स्टार सिटीको लगातार जित

रूपा गहतराज

नेपालगन्ज — सुदूरपश्चिमको स्टार सिटी युवा क्लबले एन्फा प्रेसिडेन्ट लिग–२०७७ मा लगातार दोस्रो जित हासिल गरेको छ ।

बुधबार नेपालगन्ज रंगशालामा भएको खेलमा स्टार सिटीले प्रदेश नम्बर १ को च्याम्पियन सैनिक युथ क्लबलाई २–१ ले पराजित गरेको छ । स्टारको तर्फबाट कुलदिप कार्कीले पेनाल्टीमार्फत ३८ मिनेट र रुपबहादुर लामाले गोल गरेका थिए ।

सैनिकका जीवन गुरुङले ४० मिनेटमा गोल गरेका थिए । खेलमा म्यान अफ द म्याच सैनिका गोलकिपर एवं कप्तान किशोर गिरी घोषित भए ।

सुदूरपश्चिमको स्टार सिटीले दुई खेल जित्दै ६ अंक जोड्न सफल भएको छ । स्टारले पहिलो खेलमा प्रदेश नम्बर २ को मनकामना युवा क्लबलाई ३–० ले हराएको थियो ।

१५ चैतसम्म चल्ने प्रतियोगितामा प्रदेश नम्बर १ को सैनिक फुटबल क्लब झापा, प्रदेश नम्बर २ को मनकामना युवा क्लब रौतहट, प्रदेश नम्बर ३ को धादिङ समाज धादिङ, प्रदेश नम्बर ४ बाट त्रिवेणी युवा क्लब लमजुङ, लुम्बिनी प्रदेशबाट धम्बोझी युवा क्लब बाँके, प्रदेश नम्बर ६ को लेकाली युवा क्लब जुम्ला र सुदूरपश्चिम प्रदेशको स्टार सिटी युवा क्लब कैलाली गरी लिगमा ७ वटा प्रदेशले प्रतिस्पर्धा गरिरहेका छन् ।

प्रतियोगिताको विजेताले १० लाख रुपैयाँ र उपविजेता टोलीले ५ लाख रुपैयाँ पाउनेछन् । यस प्रतियोगिताको शीर्ष चार टोलीले राष्ट्रिय लिगमा प्रतिस्पर्धा गर्नेछन् ।

प्रकाशित : चैत्र ४, २०७७ १९:४८
पूरा पढ्नुहोस्
प्रतिक्रिया
पठाउनुहोस्
×