बर्दियामा बाघको आक्रमणबाट महिलाको मृत्यु- लुम्बिनी - कान्तिपुर समाचार

बर्दियामा बाघको आक्रमणबाट महिलाको मृत्यु

कमल पन्थी

बर्दिया — बर्दिया राष्ट्रिय निकुञ्जको सानो बगौरा फाँटामा मंगलबार बाघको आक्रमण परी एक महिलाको ज्यान गएको छ ।

दिउँसो ३ बजेतिर निगुरो टिप्न गएका ४ महिलामध्ये ठाकुरबाबा नगरपालिका—७ मोहनापुरकी ६२ वर्षीया डल्ली राउतको बाघको आक्रमणमा परी मृत्यु भएको प्रमुख संरक्षण अधिकृत विष्णु श्रेष्ठले जनाए ।

अन्य ३ जना महिला सकुशल रहेका छन् । प्रमुख संरक्षण अधिकृत श्रेष्ठले चोरी बाटो हुँदै उनीहरु निकुञ्जको सीमा क्षेत्रभन्दा करिब ५ किलोमिटर भित्र पसेको बताए । सुरक्षा व्यवस्था कडा हुँदाहुँदै उनीहरु निकुञ्जभित्र चोरी बाटो हुँदै निगुरो टिप्न गएका थिए । निकुञ्ज घटनास्थल नजिक राउतको शव फेला परेको श्रेष्ठले जनाए ।

गत साउनयता बर्दियामा बाघको आक्रमणबाट ९ जनाको ज्यान गइसकेको छ । पछिल्लो समय बाघको आक्रमण निरन्तर भइरहेको हुँदा निकुञ्ज प्रशासनले सचेतना गराइरहेको छ ।

प्रकाशित : चैत्र ३, २०७७ १८:०३
प्रतिक्रिया
पठाउनुहोस्

बाघको आक्रमणमा एक जना घाइते

कमल पन्थी

बर्दिया — गेरुवा गाउँपालिका–१, वनखेतस्थित बेसवार छाउनी सामुदायिक वनबाट निस्केको बाघले आक्रमण गर्दा स्थानीय किसान घाइते भएका छन् । गोरु चराउन गएका ३५ वर्षीय सरोज कार्कीलाई बाघले आक्रमण गरेको हो ।

जिल्ला प्रहरी कार्यालय, बर्दियाका डीएसपी हेमबहादुर शाहीका अनुसार बिहीबार बेलुकी गोरु लिई फर्कने क्रममा कार्कीलाई बाघले आक्रमण गरेको हो । उनको दुवै हात र डाढमा चोट लागेको छ ।

कार्कीको प्राथमिक स्वास्थ्य केन्द्र, राजापुरमा उपचार भई रहेको छ । उनको अवस्थामा सामान्य रहेको डीएसपी शाहीले जनाए । स्थानीय प्रशासनले मध्यवर्ती क्षेत्र र आसपासका जंगलमा घाँस–दाउरा र चरिचरनमा नजान सूचना जारी गरेकै दिन बाघले आक्रमण गरेको हो । बाघले मानिसलाई पटकपटक आक्रमण गरेपछि थप अध्ययन गर्न विज्ञ टोली बर्दिया निकुञ्ज आउने भएको छ ।

प्रकाशित : फाल्गुन २८, २०७७ ०८:४५
पूरा पढ्नुहोस्
प्रतिक्रिया
पठाउनुहोस्
×