क्वारेन्टाइन अव्यवस्थित भएको भन्दै रूपन्देहीमा प्रदर्शन

क्वारेन्टाइनमा बसेकाले सडकमा खाना फाल्ने र कर्मचारीले पनि क्वारेन्टाइनका खाना घर लैजाँदा जोखिम बढेको स्थानीयको आरोप 
सन्जु पौडेल

तिलोत्तमा (रूपन्देही) — रूपन्देहीको कोटहीमाई गाउँपालिका–६ स्थित बोगडी माविमा राखिएको क्वारेन्टाइन व्यवस्थित नभएको भन्दै स्थानीय प्रदर्शनमा उत्रिएका छन् । क्वारेन्टाइनमा खटिएका कर्मचारीले लापरबाही गर्दा संक्रमणको जोखिम बढेको उनीहरूको आरोप छ ।


चार सयभन्दा बढी व्यक्तिले गाउँपालिका अध्यक्षविरुद्ध नाराबाजी गर्दै विरोध जुलुस निकालेका हुन् । उक्त क्वारेन्टाइन पाँचदिन अघि बनाइएको हो । क्वारेन्टाइनमा बसेकाले खेर गएको खाना प्लास्टिकको झोलामा राखेर सडकमा फ्याँक्ने गरेको र कर्मचारीले बचेको खाना–खाजा घर लैजाँदा जोखिम बढेको स्थानीयको भनाइ छ ।

यसबारे गाउँपालिका अध्यक्ष चन्द्रभूषण यादवलाई जानकारी गराए पनि सुनुवाइ नभएको निशान्त पाण्डेले बताए । ‘क्वारेन्टाइन निर्माण भएदेखि लापरबाही हुन थालेको हो,’ उनले भने, ‘धेरैपटक कर्मचारी र गाउँपालिकालाई आग्रह गर्दा पनि नसुनेजस्तो गरेपछि गाउँले सबै विरोधमा उत्रिएका हौं ।’ क्वारेन्टाइनबाट सडकमा फ्याँकिएको खाना खाएर पशुपचौपाया घरघरमा जाने भएकाले तिनैबाट कोरोना संक्रमणको जोखिम भएको पाण्डेले बताए ।

कर्मचारीहरू पनि गाउँमा हिँडडुल गर्दा त्रास बढेको भन्दै स्थानीयले उनीहरूलाई क्वारेन्टाइनमै बस्न आग्रह गरेका छन् । क्वारेन्टाइनमा बसेका मानिस साँझ परेपछि गाउँ घुम्ने, कर्मचारीले त्यहाँ पकाएको खाना घरमा लिएर जाँदा त्रास फैलिएको अर्का स्थानीय सन्दीप त्रिपाठीले बताए । ‘यसबारे अध्यक्षलाई जानकारी गराउन घरमै पुगियो, तर उहाँ नसुनेझैं गरी गाडी चढेर हिँड्नुभयो,’ उनले भने, ‘विरोध गरेपछि अहिले प्रहरी परिचालन गरी मुख्य चोकमा गाडीमा बसेर हेर्ने काम गर्नुभएको छ ।’

क्वारेन्टाइनस्थलबाट निम्तिएको जोखिमबारे मझगाँवा प्रहरीमा निवेदन दिएकोमा त्यहाँबाट पनि सहयोग नपाएको स्थानीयको गुनासो छ ।

प्रकाशित : जेष्ठ १०, २०७७ १०:३७
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

काेरोनाले मृत्यु भएकी महिलाकाे शिशुलाई पूर्वमन्त्रीदेखि स्थानीयसम्मको सहयोग 

अनिश तिवारी

सिन्धुपाल्चोक — कोरोना भाइरस (कोभिड १९) संक्रमणबाट मृत्यु भएकी बाह्रबिसे नगरकी सुत्केरी महिलाको शिशुको स्याहारसुसारका लागि सहयोग दिनेहरु बढेका छन् ।

पीसीआर परीक्षण नेगेटिभ आएपछि काभ्रेको धुलिखेल अस्पतालबाट डिस्चार्ज भएलगत्तै शिशुका परिवारलाई भेट्दै पूर्वमन्त्रीदेखि स्थानीयले यथासक्दो रकम सहयोग गरेका हुन् ।

मेलम्ची नगरपालिका–११ का दिनेश खतिवडाले ५१ हजार एकसय ५१ रुपैयाँ सहयोग पीडितकै खातामा जम्मा गरिदिए । पोखराकी समाजसेवी पार्वती गुरुङ, माया गुरुङको ५० हजार र ५० हजारसहित एक लाख रुपैयाँ पूर्व सूचना तथा सञ्चारमन्त्री मोहनबहादुर बस्नेतले शिशुका आफन्तलाई शुक्रबार हस्तान्तरण गरे ।

उज्ज्वल भविष्यको कामना गर्दै सघाउने पूर्वमन्त्री बस्नेतसहित सम्पूर्ण सहयोगीलाई संक्रमितका परिवारले भावुक हुँदै धन्यवाद दिएका थिए । पूर्वमन्त्री बस्नेत र प्रदेश–३ का सामाजिक तथा विकास मन्त्री युवराज दुलाल शरदले पीडितलाई सघाउन सबै एकजुट भएर लाग्न आग्रह गरेका छन् । पूर्वमन्त्री र मन्त्रीको आग्रहमा स्थानीयले मृतक संक्रमितको अध्ययन र सुस्याहारको लागि रकम सहयोग गरेका हुन् । ‘मेरै आग्रहमा खतिवडाजीले सघाउनुभयो, अरु पनि अग्रसर हुनुभएको छ, दुखमा परेकालाई म आफै पनि गर्नुपर्ने सहयोगमा तत्पर छु,’ संक्रमितको आफन्तको स्वास्थ्य बुझ्न गाउँमै पुगेका मन्त्री शरदले भने । महिलाको मृत्यु भएलगत्तै वाग्मती सरकारको विज्ञ संलग्न र्‍यापिड रेस्पोन्ससहित जिल्ला स्वास्थ्यकर्मीको टिम लिएर गाउँमा पुगेका उनले सबैलाई ढुक्क हुन आग्रह गरेका थिए ।

सबै स्वास्थ्यकर्मीको म्यादी बिमा

आमा गुमाएका नवजात शिशुको १२ कक्षासम्मको शिक्षा र त्यसपछिको रोजगारीको जिम्मा लिने प्रतिबद्धता गरेका पूर्वमन्त्री मोहनबहादुर बस्नेतले फ्रन्टलाइनमा खटिरहेका स्वाथ्यकर्मीको कोरोना म्यादी बिमा गरिदिने बताए । उनका अनुसार जिल्लाभरका तीन नगर र नौ गाउँपालिकाभरका सबै सरकारी अस्पताल, प्राथामिक स्वास्थ्य केन्द्रदेखि स्वास्थ्य चौकी, एकाइका सम्पूर्ण कर्मचारीको बिमा गरिनेछ । ‘उहाँहरुको मनोबल उच्च बनाउन यो अभियान सुरु गरेका हाैं, फ्रन्टलाइनमा खटिरहेका स्वाथ्यकर्मी र सुरक्षाकर्मी उच्च जोखिममा छन्,’ उनले भने । बिमा गरिदिने खबर अहोरात्र खटिरहेका स्वास्थ्यकर्मी उत्साहित भएका छन् ।

प्रकाशित : जेष्ठ १०, २०७७ १०:२७
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
×