मृतक बसेको क्वारेन्टाइनमा बस्न नमानेपछि ३८ जनालाई सारियो- प्रदेश ५ - कान्तिपुर समाचार
कान्तिपुर वेबसाईट
AdvertisementAdvertisement

मृतक बसेको क्वारेन्टाइनमा बस्न नमानेपछि ३८ जनालाई सारियो

रूपा गहतराज

बाँके — कोरोनाबाट आइतबार एक युवकको मृत्यु भएको नरैनापुर गाउँपालिका–५ स्थित दीपेन्द्र प्रावि क्वारेन्टाइनमा रहेका अन्य ३८ जनालाई त्यहाँबाट सारिएको छ । उनीहरूलाई जयकिसान माविको क्वारेन्टाइनमा लगिएको हो ।

बाँके, नरैनापुरकाे क्वारेन्टाइनस्थल ।

मृतक बसेको क्वारेन्टाइनमा बस्न नमानेपछि आइतबार साँझ सबैलाई सारिएको गाउँपालिका अध्यक्ष इस्तियाक अहमद शाहले बताए । गाउँपालिकाका स्वास्थ्य शाखा प्रमुख मोहम्मद मोइद खानका अनुसार जयकिसान माविमा यसअघि नै ६० जना छन् । दीपेन्द प्राविबाट आएकाहरूलाई ठाउँ नपुगेकाले टेन्टमा राखिएको छन् । ‘उनीहरू त्यहाँ बस्न नमानेपछि यहीँ टेन्ट बनाएर राखेका छौं,’ उनले भने, ‘थप क्वारेन्टाइनका लागि ठाउँ खोज्दै छौं ।’

नरैनापुरका १२ स्थानमा रहेका क्वारेन्टाइनमा अझै ७ सय ५९ जना छन् । कोरोनाले एक जनाको मृत्यु भएपछि गाउँले त्रस्त छन् । ‘गाउँपालिकाको एक्लो व्यवस्थापनले गाउँले नै क्षति बेहोर्नुपर्‍यो,’ वडाध्यक्ष कृष्णचन्द्र मार्यले भने, ‘हामी काम गर्न नै सकिरहेका छैनौं ।’

नरैनापुर–५ को उक्त क्वारेन्टाइनमा मुम्बईबाट आएका ती युवकसहित ३९ जनालाई राखिएको थियो ।


प्रकाशित : जेष्ठ ५, २०७७ ११:५५
प्रतिक्रिया
पठाउनुहोस्

भारतमा एकैदिन ५ हजारभन्दा बढीमा कोरोना, संक्रमितको संख्या ९६ हजार नाघ्यो

चौथो चरणको लकडाउन केही खुकुलो
कान्तिपुर संवाददाता

नयाँदिल्ली — भारतमा पछिल्लो २४ घण्टामा थप ५ हजार २ सय ४२ जनामा कोरोना भाइरस(कोभिड–१९) को संक्रमण देखिएको छ । पहिलो पटक कोरोना पुष्टि भएयता एकैदिन भारतमा धेरै व्यक्तिमा कोरोना संक्रमण पुुष्टि भएको हो । योसँगै भारतमा संक्रमितको संख्या ९६ हजार १ सय ६९ पुगेको छ । 

गुजरातको अहमाबादबाट घर फर्कनका लागि आइतबार रेल चढ्नका लागि पालो पर्खिरहेका मजदुर तस्बिर : एपी

भारतीय केन्द्रीय स्वास्थ्य मन्त्रालयका अनुसार पछिल्लो २४ घण्टामा कोरोना भाइरसको संक्रमणबाट १५७ जनाको मृत्यु भएको छ । भारतमा अहिलेसम्म कोरोना भाइरसबाट मृत्यु हुनेको संख्या ३ हजार २९ पुगेको छ । संक्रमण पुष्टि भएकामध्ये ३६ हजार ८ सय २३ जना निको भएर घर फर्किएको मन्त्रालयले जनाएको छ । हप्तौंको लकडाउनका बीच पनि भारतमा कोरोना भाइरसको संक्रमण तीव्र रुपमा बढिरहेको छ ।

भारतको महाराष्ट्र कोरोना भाइरसको संक्रमणबाट सबैभन्दा बढी प्रभावित भएको छ । अहिलेसम्म महाराष्ट्रमा ३३ हजार ५३ जना संक्रमित भएका छन् भने एक हजार १ सय ९८ जनाको मृत्यु भएको छ । त्यस्तै गुजरातमा ११ हजार ३ सय ७९ जना संक्रमित भएका छन् भने ६ सय ५९ जनाको मृत्यु भएको छ । तमिलनाडुमा ११ हजार २ सय २४ संक्रमित र ७८ जनाको मृत्यु भएको छ । दिल्लीमा १० हजार ५४ जनामा संक्रमण पुष्टि हुँदा एक सय ६० जनाको मृत्यु भएको छ । राजस्थानमा ५ हजार २ सय २ जनामा संक्रमण पुष्टि भएको छ भने एक सय ३१ जनाको मृत्यु भएको छ ।

चौथो चरणको लकडाउनको स्वरुप परिवर्तत

भारत सरकारले कोरोना भाइरसको नियन्त्रण र रोकथानका लागि भन्दै लकडाउनको अवधि ३१ मेसम्म थपेको छ । भारतको गृह मन्त्रालयले गत २४ मार्चदेखि लागू गरिएको लकडाउन थप १४ दिनका लागि बढाउने निर्णय गरेको हो । मे ४ देखि गरिएको तेस्रो चरणको लकडाउनको आइतबार सकिएको थियो ।

लकडाउन लम्बाउने निर्णयसँगै बसलगायतका सार्वजनिक यातायात साधनहरू सञ्चालन पनि खुला गरिएको छ । विगत केही दिनयता भारतभरि नै कोरोना भाइरसको संक्रमितको संख्यामा वृद्धि देखिएपछि चौथो चरणको लकडाउन गर्ने निर्णय गरिएको हो । भारतमा विगत केही दिनयता संक्रमणको वृद्धिदर उच्च देखिएको छ ।

लकडाउन बढाउने निर्णयसँगै त्यसको स्वरूप पनि तय गरिएको छ । र, अघिल्ला लकडाउनभन्दा केही खुकुलो बनाइएको छ । गृह मन्त्रालयद्वारा आइतबार साँझ जारी नयाँ दिग्दर्शनअुनसार संक्रमणको जोखिम हेरेर क्षेत्र अधिकार प्रदेश तथा केन्द्र शासित राज्यहरूले क्षेत्र निर्धारण गर्न पाउनेछन् । यसअघि केन्द्र सरकारले नै त्यस्ता क्षेत्र निर्धारण गरेको थियो । यसअघि केन्द्र सरकारले संक्रमणको सघनताका आधारमा भारतका ७ सय ३३ जिल्लालाई रातो, सुन्तला र हरियो क्षेत्रमा वर्गीकरणसमेत गरेको थियो ।

संक्रमण उच्च भएका १ सय ३० जिल्लालाई रातो, संक्रमण सीमित भएको र पछिल्ला दिनमा वृद्धि नदेखिएका २ सय ८४ लाई सुन्तला र पछिल्लो २१ दिनमा एउटा पनि संक्रमणको केस नदेखिएका जिल्लालाई हरियो क्षेत्र निर्धारण गरिएको थियो । यसका अतिरिक्त रातो क्षेत्रभित्र पनि संक्रमण फैलने जोखिम रहेका क्षेत्रलाई ‘कन्टेनमेन्ट जोन’ तोकिएको थियो ।

यसैगरी, राज्यहरूबीच चल्ने बसलगायतका यात्रुबाहक सार्वजनिक सवारीसाधनलाई तोकिएका मापदण्ड पूरा गरेर चलाउन छुट दिइएको छ । तर, ‘कन्टेनमेन्ट जोन’ मा भने त्यो सुविधा लागू हुने छैन । तोकिएका गन्तव्यका लागि रेलसेवा यसअघि नै खुला भइसकेको छ । त्यसैगरी अलपत्र परेका प्रवासी कामदार, पर्यटक, तीर्थयात्री, विद्यार्थीका लागि भनेर विशेष रेलसेवा पनि सञ्चालनमा छ । हवाई तथा मेट्रो रेलसेवा भने खुला गरिएको छैन ।

चौथो चरणको लकडाउनमा पहिलोपटक रंगशालालगायतका खेलस्थलहरूलाई खोल्न अनुमति दिइए पनि दर्शकको प्रवेशलाई भने निषेध गरिएको छ । साथै छिमेकी मुलुकसँगका अन्तरदेशीय व्यापार सन्धिको अधीनमा रहेर हुने वस्तु तथा कार्गोको ओसारपसार पनि गर्न पाइने मन्त्रालयद्वारा जारी दिग्दर्शनमा उल्लेख छ ।

यसअघिका लकडाउनहरूमा जस्तै रात्रिकालीन कर्फ्युलाई भने निरन्तरता दिइएको छ । मानिसको आउजाउलाई रोक्न साँझ ७ बजेदेखि बिहान ७ बजेसम्मका लागि लगाइएको यसअघिको कर्फ्यु चौथो चरणको लकडाउनमा पनि यथावत् राखिएको छ ।

प्रकाशित : जेष्ठ ५, २०७७ ११:४१
पूरा पढ्नुहोस्
प्रतिक्रिया
पठाउनुहोस्
×