खेलकुद मैदानमा बन्यो क्‍वारेन्टाइन स्थल

गिरुप्रसाद भण्डारी

प्यूठान — गृह मन्त्रालयबाट आएको टेन्ट प्रयोग गरी प्यूठान नगरपालिका–४ स्थित गणतान्त्रिक खेलकुद मैदानलाई बिहीबार क्‍वारेन्टाइन स्थल निर्माण गरिएको छ । कोभिड १९ का सम्भावित बिरामीलाई लक्षित गरी ५० जना राख्‍न सकिने गरी क्‍वारेन्टाइन निर्माण गरिएको हो । प्यूठान नगरपालिका र ईन्द्रध्वज गण खलंगाले क्‍वारेन्टाइन स्थल निर्माण गरेको हो ।

हेल्थ क्याम्पसहितको क्‍वारेन्टाइनस्थल निर्माण भएको ईन्द्रध्वज गणले जनाएको छ । क्‍वारेन्टाइन स्थलमा खानेपानी, शौचालयलगायत भौतिक पूर्वाधारको व्यवस्थापनको काम धमाधम भइरहेको प्यूठान नगरपालिकाका मेयर अर्जुनकुमार कक्षपतिले बताए ।


यस्तै प्यूठानमा सबै स्थानीय तहहरुले समेत ५ देखि १० बेडसम्मका क्‍वारेन्टाइन स्थल निर्माण गरेका छन् । लकडाउनको समयमा समेत भारतबाट विभिन्न नाका हुँदै भाग्दै जिल्ला आएकाहरुलाई क्‍वारेन्टाइनमा राख्ने योजना रहेको प्रमुख जिल्ला अधिकारी कृष्णप्रसाद पन्थले बताए ।


विदेशबाट आएकाहरुको लगत लिने काम पालिकामार्फत भइरहेकाले उनीहरुलाई सम्झाइबुझाई बिहीबार बेलुकाबाटै क्‍वारेन्टाइनमा बसाल्न थालिएको ऐरावती गाउँपालिकाका अध्यक्ष नविलबिक्रम शाहले जानकारी दिए । प्रकाशित : चैत्र १३, २०७६ १७:५८

प्रतिक्रिया
पठाउनुहोस्
ADVERTISEMENT

खेलाडीको लकडाउन डायरी : को के गर्दैछन् ?

नमिता दाहाल

काठमाडौँ — कोभिड–१९ (कोरोना भाइरस)को जोखिम नियन्त्रणका संंसारभरका खेलकुद प्रतियोगिताहरु बन्द गरिएका छन् । खेलकुद प्रतियोगिता बन्द भएसँगै खेलाडीहरु पनि फुसर्दिला भएका छन् । फुर्सदको यो समयमा प्राय खेलाडीहरु घरमै सेल्फ आइसोलेसनमा छन् । सरकारले नेपालभर एक साताका लागि लकडाउन गरेपछि सधैं खेलमा व्यस्त हुने खेलाडीहरु यतिबेला घरभित्रै सिमित भएका छन् । 


फुटबलका भरत खवास लकडाउन पछि घरमै सेल्फ आइसोलेसनमा छन्। अरुबेला खेल र जागिरबाट फुर्सद नहुने उनी फुर्सदिला भएका छन्। नयाँनयाँ किताबहरु पढिरहेका छन्। उनी यतिबेला भागवत गीता पढ्दैछन्। सेल्फ आइसोलेसनमा बस्दा समयको सदुपयोग गर्न उनले किताब पढ्ने र घरका सदस्यहरुसँग समय बिताइरहेका छन्। उनले भने, ‘किताब पढेर सेल्फ आइसोलेसनको सदुपयोग गर्दैछु।’

यसरी सेल्फ आइसोलेसनमा बसेका खवासले सरकारद्वारा अपनाइएको लकडाउनको सम्मान गर्दै घरमै बस्न सम्पूर्णलाई आग्रह गरे। उनले आफू सुरक्षित भइ अरुलाई पनि सुरक्षित रहन आग्रह गरे। ‘स्वास्थ्य भन्दा ठूलो केही हैन। आफ्नो स्वास्थ्यको ख्याल गरी कोरोनाबाट बचौं।’

करातेकी सुनिता मर्हजन पनि लकडाउनपछि काम र खेल दुवै नभएपछि फुर्सदमा छिन्। लकडाउन लामो छुट्टिजस्तो लागेको बताउने उनी घरपरिवारसँग समय बिताउँदै छिन्। व्यस्त तालिकाबाट परिवारसँग समय बिताउन पाएकोमा खुसी लागेको बताइन्। उनले भनिन्, ‘कोरोना महामारीले सबैमा नराम्रो असर पारिरहेको छ। तर हामीजस्ता व्यस्त मानिसहरुका लागि भने परिवारसँग समय बिताउने अवसर पनि भएको छ।’

उनी परिवारका सबैजनासँगै भएर एकअर्काको स्वास्थ्यको ख्याल पनि राखिरहेको बताइन्। रमाइलो सँगै सबैलाई सजग रहन र स्वास्थ्यको ख्याल राख्न पनि उनले आग्रह गरिन्। ‘कोरोनालाई सहज रुपमा नलिऔं।आफ्नो र परिवार सबैको ख्याल गरौंं।’

करातेका नविन रसाइली पनि घरमै छन्। समाचार पढ्ने र स्वास्थ्यको ख्याल गरी घरमै व्यायाम गर्दै बसेका छन्। सन् २०२० मा हुने भनिएको ओलम्पिकमा नेपालको तर्फबाट नकआउट चरणको माध्यमबाट छानिएका उनी कोरोनाका कारण ओलम्पिक सर्ने भएपछि फुर्सदमा छन्। सरकारले अपनाएको सर्तकताको पालना गर्दै घरमा बसेको उनले बताए। उनले भने, ‘खेलकुद सबै बन्द भयो। प्रशिक्षण पनि बन्द भयो। अहिले घरमा समाचार पढने, टेलिभिजन हेर्ने गर्दैछु।’ अहिलेको नाजुक अवस्थामा सबैले सरकारले अपनाएको नियमको कार्यान्वयन गर्दै घरमा बसेर सजगता अपनाउनु नै बेस रहेको बताए। कोभिड–१९ विरुद्ध सरकारको अभियान सफल बनाउन सबैलाई आग्रह गरे। भने, ‘सबैजना घरमा बसौं। स्वास्थ्यको ख्याल गरी सरकारी नीतिको सम्मान गरौंं।’

सबै खेल बन्द भएसँगै फुर्सदिला बनेका सबै खेलाडी आफ्नो स्वास्थ्यको ख्याल गर्दै सेल्फ आइसोलेसनमा छन्। कोरोना महामारीबाट बच्न अहिले आफ्नो स्वास्थ्यको हेरविचार र ख्याल नै सबैको मुख्य चासोको विषय बनेको छ।

भलिबलकी रेश्मा भण्डारी पनि हाल घरको सेल्फ आइसोलेसनमा छिन्। फुर्सदको समयमा घरको काममा परिवारलाई सहयोग गर्ने र फिल्म हेरेर समय बिताइरहेकी छिन् । ‘घरको काम गर्ने, फिल्म हेर्ने, गीतहरु सुन्ने आदि गरेर दिन बितिरहेको छ।’ सरकारले घर बाहिर ननिस्कनु भनेपछि नियम पालना गरिरहेको उनले बताइन्। भनिन्, ‘घरमा नै बसेर रमाइलो गर्नुस्। बाहिर नजानुस्। यसो गरेमा कोरोना रोकथाममा सहयोग पुग्छ।’ चाँडै भाइरस निर्मूल भएमा सबैलाई सजिलो हुने र छिट्टै यो अवस्था हटोस् भन्ने कामना पनि गरिन्।

नेपालमा पनि कोभिड–१९ को संक्रमण बढ्दै गएकाले स्वास्थ्यमा विचार पुर्‍याउन सबै खेलाडीको ध्यानाकर्षण भइरहेको छ। सबैजना कसरी कोरोनालाई नर्मूल पार्न सकिन्छ भन्नेमा जोड दिइरहेका छन्।

क्रिकेटका सन्दिप लामिछाने पनि हाल घरमा सेल्फ आइसोलेसनमा रहेका छन्। इन्स्टाग्राम मार्फत आइसोलेसनको तेस्रो दिन बिताइरहेको भन्दै पोस्ट सेयर गरेका छन्। पोस्ट मार्फत उनले सबैलाई सुरक्षित रहन समेत आग्रह गरेका छन्।

क्रिकेट खेलाडी भुवन कार्की अहिले सम्पूर्ण काम बन्द गरेर घरमा बसेका छन्। उनले फिल्म, खेल सम्बन्धित भिडियो हेर्दै लकडाउनको समय उपयोग गरिरहेका छन्। उनले भने, ‘अहिले सबै बन्द छ। घरमा परिवारसँग समय बिताउने, फिल्म हेर्ने, खेलकुदका राम्रा राम्रा भिडियो हेर्ने गरिरहेको छु।’

त्यस्तै क्रिकेट खेलाडी रूबिना क्षेत्री झापास्थित घरमै छिन्। फुर्सदको समयमा उनी घरमा सम्भव भएजति शारीरिक कसरत गर्दैछिन्। उनले भनिन्, ‘घरमै हलुका कसरत गर्दैछु। परिवारसँग रमाइलो गर्ने, फिल्म र भिडियोहरु हेर्दै दिन बिताउँदैछु।’ यसरी फुर्सदमा रहँदा समयको सदुपयोग गर्दैै आफूमा लुकेका कला छन् भने प्रस्फुटन गर्न सकिने उनले बताइन्। कोरोनाको नडराइ सामाना गर्न र भ्रमपूर्ण खबरहरुको पछि नलागी सजगता अपनाउनु नै उत्तम रहने उनले सुनाइन्।

प्रकाशित : चैत्र १३, २०७६ १७:५२
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
×