कोरोना संक्रमितलाई उपचार गर्न मेडिकल सामग्री अभाव

काशीराम डाँगी

(रोल्पा) — कोरोना भाइरस संक्रमणबाट जोगिन र बिरामीलाई उपचार गर्न रोल्पा अस्पतालका चिकित्सकलाई आवश्यक पर्ने मेडिकल सामग्री अभाव भएको छ ।

आवश्यक सामग्री जुटाइदिन चिकित्सकले प्रमुख जिल्ला अधिकारी र रोल्पा नगरपालिकासँग आग्रह गरिएको जनाएका छन् । अस्पताल प्रमुख डा धनमाया घर्तीमगरले केही संख्यामा मास्कबाहेक अतिआवश्यक सामग्री मौज्दात नभएको बताइन् । त्यसबारे अस्पताल व्यवस्थापन समिति लगायत नगर प्रमुखलाई जानकारी गराइसकिएको उनले बताइन् । संभावित बिरामीलाई अस्पतालमा ल्याएर उपचार गर्नुपरेमा चिकित्सकलाई संक्रमणबाट जोगाउन अत्यावश्यक सामग्री नभएकोमा चिन्ता भएको उनले बताइन् ।


अस्पतालले चिकित्सकसहित स्वास्थ्यकर्मीका लागि क्याप, गाउन, चस्मा, मास्क, ग्लोव, स्यानीटाइजर लगायत सामग्री खाँचो भएको जनाएको छ । रेउघास्थित जिल्ला अस्पतालका मेडिकल अधिकृत डा. अनिल केसीले प्रमुख जिल्ला अधिकारीको अध्यक्षमा भएको जिल्ला प्रकोप व्यवस्थापन र सर्वपक्षीय बैठकमा आवश्यक सामानबारे लेखेर जानकारी गराएको बताए । कोरोना संक्रमण भई आउन सक्ने बिरामीको उपचार गर्दा चिकित्सकले पहिले आफ्नो सुरक्षा भएमात्रै उपचार सम्भव हुने बताए ।


अस्पतालले स्वास्थ्यकर्मीका लागि अवश्यक पर्ने व्यक्तिगत प्रोटेक्टिभ इक्यूभमेन्ट (पीपीई) उपलब्ध गराइदिन नगर प्रमुख पूर्ण केसी र प्रमुख जिल्ला अधिकारी लक्ष्मण ढकालसँग आग्रह गरेको हो । जसमध्ये व्यक्तिगत प्रोटेक्टिभ इक्यूभमेन्ट (पीपीई) १ हजार थान, सर्जिकल मास्क १० हजार थान, एनजिजे मास्क ५ सय थान, सर्जिकल ग्लोव १० हजार थान, हेण्ड स्यानीटाइजर १ हजार थान, स्प्रिट एक हजार थान, इन्फ्रारेड थर्मोमिटर १० थान, अक्सिजन कन्सन्ट्रेटर र नेवोलाईजर २०/२० थान, संक्रमित स्याम्पल संकलन औजारलगायत सामग्री माग गरिएको हो ।


अस्पताल व्यवस्थापन समिति अध्यक्ष फविन्द्र आचार्यले प्रदेश सरकारलाई आवश्यक सामग्री उपलब्ध गराइदिन माग गरिएको बताए । प्रमुख जिल्ला अधिकारी ढकालले जिल्लामा हुन सक्ने संभावित संक्रमण रोक्न र उपचारको व्यवस्था गर्न सबै जनशक्तिलाई परिचालन गर्ने निर्णय गरिएको बताए ।


छैन क्‍वारेन्टाइन

कोरोना संक्रमण बढ्ने देखिएपछि सरकारले मंगलबारदेखि लकडाउन गर्‍यो । त्यसअघि भारत लगायत विभिन्‍न देशमा रोजगारीमा पुगेकाहरु घर फर्किसकेका थिए । चिकित्सकले नव आगन्तुकलाई क्‍वारेन्टाइनमा राख्न नसकिएकाले घरमै बस्न भन्नुको विकल्प नभएको बताए ।


प्रहरीका अनुसार भारत, खाडी मुलुक र मुलुकभित्रैका विभिन्न सहरबाट करिब एक हजारको संख्यामा फिर्ता भएका हुन् । उनीहरु रोल्पा प्रवेश गर्ने मुख्य नाकाहरु होलेरी, खुंग्री, निगालपानी, जिनाबाङ लगायतबाट भित्रिए । अधिकांश मानिस बिनाजाँच गाउँ पसेका प्रमुख जिल्ला अधिकारी ढकालले बताए ।


अस्पतालबाहिर आइसोलेसन कक्ष

संक्रमित भएर उपचारमा आएका बिरामीलाई राख्न रोल्पा अस्पतालमा ४ वटा कोठा छुटाइएको छ । जिल्ला स्वास्थ्य प्रमुख अनिल केसीले हाल ४ वटा आइसोलेसन कक्ष तयार पारिएको बताए ।


यस्तै अस्पताल बाहिर टेन्ट राखेर आइसोलेसन कक्षा समेत तयार पारिएको छ । बिरामी आएमा उपचार गर्न स्थान अभाव हुने देखिएपछि थप कक्ष तयार पार्न सोमबार बसेको सर्वपक्षीय बैठकले निर्णय गरेको थियो ।


सरकारले मंगलबारदेखि लकडाउन गरेपछि रोल्पा सदरमुकाम सुनसान छ । गाउँमा भने चहलपहल रहेको प्रहरीले जनाएको छ । लकडाउन घोषणा गर्नुअघि नै रोल्पा उद्योग वाणिज्य संघले बजार बन्द गर्ने निर्णय गरेको थियो । प्रकाशित : चैत्र ११, २०७६ १६:२८

प्रतिक्रिया
पठाउनुहोस्

गौरीफन्टा नाकामा रोकिएकालाई क्वारेन्टाइनमा बस्नेगरी प्रवेश गर्न दिइने

मोहन बुढाऐर

धनगढी — सुदूरपश्चिम प्रदेशको कैलाली जिल्लाको गौरीफन्टामा रोकिएका करिब एक हजार नेपालीलाई स्थानीय प्रशासनले क्वारेन्टाइनमा राख्ने प्रवेशको अनुमति दिने भएको छ। 

प्रमुख जिल्ला अधिकारी यज्ञराज बोहराले सीमा नाकाको दशगजा क्षेत्रमा रोकेर राखिएका नेपालीलाई सम्बन्धित गाउँ तथा नगरपालिकाको क्वारेन्टाइनमा राख्ने गरी भित्राउन लागेको बताए । ‘त्यहाँ रोकिएका नेपालीलाई सम्बन्धित जिल्लामा बसमा पुऱ्याउने भएका छौं,’ ‘उनले भने, ‘अहिले उनीहरुको स्वास्थ्य परीक्षण र व्यक्तिगत बिवरण लिने काम भइरहेको छ ।’
प्रजिअ बोहराले विवरण संकलन भएपछि साँझसम्म उनीहरुलाई गन्तव्यतर्फ लगिने बताए । उनका अनुसार उनीहरुलाई गनतव्यमा पुगाउन यतायात समितिहरुको बस उपलब्ध गराइने छन् । ‘सम्बन्धित जिल्लामा बसले पुगाएपछि प्रदेश स्थानीय तहले उनीहरुलाई क्वारेन्टाइनमा राख्ने छन्,’उनले भने ।
गौरीफन्टा नाकामा तनाव
भारतका विभिन्न सहरमा काम गर्ने करिब एक हजार नेपाली सोमबार साँझदेखि मंगलबार बिहानसम्म गौरीफन्टा नाकामा आइपुगेका थिए । उनीहरुलाई स्थानीय प्रशासनले प्रवेश गर्न दिएको थिएन । सोमबार साँझ पुगेका नेपालीहरु दशगजाको खुल्ला चौरमै रात बिताउन बाध्य भएका थिए ।

मंगलबार बिहान उनीहरुले घर फर्कन पाउनुपर्ने माग राख्दै चर्काे नाराबाजी जबर्जस्ती गरेका थिए । प्रजिअ बोहराका अनुसार गृह मन्त्रालय र प्रदेश सरकार संगको समुन्वय गरेर उनिहरुलाई स्वदेश प्रवेश गर्न दिने निर्णय स्थानिय प्रशासनले गरेको हो ।

प्रकाशित : चैत्र ११, २०७६ १६:२७
पूरा पढ्नुहोस्
प्रतिक्रिया
पठाउनुहोस्
×