नक्कली सुन धितो राखेर २४ लाख कर्जा - गण्डकी - कान्तिपुर समाचार
कान्तिपुर वेबसाईट
AdvertisementAdvertisement

नक्कली सुन धितो राखेर २४ लाख कर्जा 

कान्तिपुर संवाददाता

पोखरा — नक्कली सुन बैंकमा धितो राखेर २४ लाख रुपैयाँ ठगी गर्नेलाई कास्की प्रहरीले फेला पारेको छ । पर्वतको कुश्मा घर भई हाल पोखरा बस्ने २५ वर्षीय अभिषेक सुनारले राष्ट्रिय वाणिज्य बैंकका दुई शाखाबाट विभिन्न मितिमा उक्त रकम कर्जा लिएको भेटिएको हो ।  

सुनारले पोखरा–१७ विरौटामा रहेको बैंकको शाखाबाट १६ लाख ६० हजार र पृथ्वीचोक शाखाबाट ७ लाख ४५ हजार गरी २४ लाख ५ हजार रुपैयाँ कर्जा लिएका थिए । उनले लामो समयसम्म कर्जाको ब्याज तथा साँवा बुझाउन नआएपछि बैंकले शंका लागेर धितो राखेको गरगहना जाँच गरेको थियो ।

गरगहना जाँच गर्दा कमसल सुन प्रयोग गरी तयार गरिएको खुल्न आएको थियो । बैंकको उजुरीको आधारमा प्रहरीले सुनारलाई शुक्रबार पक्राउ गरेको जिल्ला प्रहरी प्रवक्ता सुन्दर तिवारीले बताए । उनका अनुसार प्रहरीले सुनारलाई आइतबार जिल्ला अदालतबाट ठगी, आपराधिक विश्वासघात तथा आपराधिक लाभसम्बन्धी कसुरमा पाँच दिन म्याद थप गरी अनुसन्धान अगाडि बढाएको छ ।

राष्ट्रिय वाणिज्य बैंक विरौटा शाखाका प्रबन्धक सञ्जीव सुवेदीले धितो राखिएका गहना सामान्य आँखाले सक्कली र नक्कली छुटयाउन नसकिने किसिमको रहेको बताए । ‘धितो राख्ने बेला हेरेर, ढुंगाले घोटेर वा एसिड हालेर परीक्षण गर्ने हो,’ उनले भने, ‘त्यसबाहेक काटेर हेर्नुपर्छ । ग्राहकको गहना काटिहाल्न मिल्दैन । पछि पनि सक्कली नै हो भन्ने थियो । मेसिनमा लगेर परीक्षण गरेपछि मात्रै नक्कली भन्ने थाहा भयो ।’

प्रकाशित : कार्तिक २८, २०७९ २०:१५
प्रतिक्रिया
पठाउनुहोस्

कांग्रेसजनलाई ओनसरीको आग्रह : मलाई काठमाडौंमा जिताउनुस्, हामी रोल्पाका कांग्रेस जिताउँदैछौं 

'दुई-दुई पटक संसद् विघटन गर्ने ओलीलाई निर्वाचनबाट जनताले दण्डित गर्नुपर्छ'
कान्तिपुर संवाददाता

काठमाडौँ — पूर्वसभामुख एवं माओवादी केन्द्रकी स्थायी समिति सदस्य ओनसरी घर्तीले मंसिर ४को निर्वाचनमा माओवादी,  कांग्रेस र एकीकृत समाजवादी अर्काप्रति इमान्दार रूपमा प्रस्तुत हुने बताएकी छन् । सत्तारुढ गठबन्धनले साँखुमा सोमबार गरेको चुनावी सभालाई सम्बोधन गर्दै घर्तीले गठबन्धनमा आबद्ध कांग्रेस, माओवादी र एकीकृत समाजवादीको मत एकअर्को दलका उम्मेदवारलाई सहजै ‘ट्रान्सफर’ हुने वातावरण बनेको बताइन् ।

४ मंसिरको निर्वाचनलाई सामान्य आवधिक चुनावका रुपमा मात्र लिन नहुने चर्चा गर्दै उनले लोकतन्त्र, व्यवस्था, संविधान र जनताको जित या हारका रुपमा लिनुपर्ने उनको भनाइ थियो । घर्तीले आफूलाई माओवादीको मात्र नभई गठबन्धनको उम्मेदवारका रूपमा हेर्न भन्दै माओवादी मतदाता र जनताले अन्यत्र काँग्रेस र समाजवादीका उम्मेदवारलाई पनि आफ्नै ठानेर मत दिने उल्लेख गरिन् । कांग्रेस, माओवादी र एकीकृत समाजवादी मिलेर काठमाण्डौं–२ बाट संघमा आफू विजयी हुँदै गरेको भन्दै उनले रोल्पाको प्रदेश (ख) मा माओवादी मतले कांग्रेस उम्मेदवार विजयी हुँदै गरेको बताइन् । घर्तीको गृहिजल्ला रोल्पाको प्रदेश (ख) मा कांग्रेसका लुम्बिनी प्रदेश सभापति अमरसिंह पुन गठबन्धनका साझा उम्मेदवार छन् ।

‘कांग्रेस, माओवादी र एकीकृत समाजवादी मिलेर यहाँबाट संघमा म विजयी हुँदै गर्दा उनले रोल्पाको प्रदेश (ख) मा कांग्रेसका उम्मेदवार विजयी हुँदैछन्’, उनले भनिन्, ‘कांग्रेस मतदातालाई लक्षित गर्दै उनले भनिन्, ‘तपाईंहरु हँसिया हथौडामा भोट दिएर मलाई यहाँ जिताउँदै हुनुहुन्छ, रोल्पामा हामी रुखमा भोट दिएर कांग्रेसका उम्मेदवार जिताउँदैछौं । कतै कलम र कतै ग्लासको जित गराउँदैछौं ।’

त्यस्तै घर्तीले नेकपा एमालेका अध्यक्ष केपी शर्मा ओलीलाई आसन्न निर्वाचनबाट जनताले दण्ड दिनुपर्ने बताएकी छिन् । ओली प्रधानमन्त्री हुँदा दुईदुई पटक संसद् विघटन गरेकाले जनताले त्यसको दण्ड आसन्न निर्वाचनबाट दिनुपर्ने उनको भनाइ छ । 'यहाँ म सुन्दैछु, केपी शर्मा ओलीले आज जनतासमक्ष गएर बहुमत माग्दै हुनुहुन्छ रे ? केका लागि बहुमत, हुँदाखाँदाको कम्युनिस्ट पार्टीलाई फेरि फोर्नका लागि बहुमत ? वा दुई तिहाई बहुमतको नजिक पुगेको आफ्नै सरकारको संसदलाई दुई पटक विघटन गरेर मृत्यु शय्यामा पुर्‍याउनको लागि बहुमत ? वा उहाँले गरेको यो बीचको तानाशाही प्रवृत्ति र यो बीचको कुकर्मको लागि बहुमत ? केका लागि भोट केपी ओलीलाई ? मैले आज उहाँलाई भोट दिनुपर्ने कारण देखेको छैन,' उनले भनिन्, 'उहाँले इतिहासमा ठूलो भूल गर्नुभएको छ । जनताले ५ वर्षका लागि कम्युनिस्टलाई चलाउन दिएको देशको जनादेशलाई कुल्चिएर उहाँले जे अपराध गर्नुपर्छ, उहाँलाई भोट होइन,नेपाली जनताले दण्ड दिनुपर्छ ।'

प्रकाशित : कार्तिक २८, २०७९ २०:०८
पूरा पढ्नुहोस्
प्रतिक्रिया
पठाउनुहोस्
×